हिमाल जोगाउनु भनेको पृथ्वी, महासागर र मानवता जोगाउनु होः प्रधानमन्त्री ओली

काठमाडौँ । प्रधानमन्त्री केपी शर्मा ओलीले जलवायु परिवर्तनमा भूमिका नभएका संवेदनशील राष्ट्रलाई सहयोग गर्नुपर्नेमा जोड दिएका छन् । आजदेखि काठमाडौँमा सुरु सगरमाथा संवादको उद्घाटन सत्रमा सम्बोधन गर्दै उनले वातावरण संरक्षणमा महत्वपूर्ण भूमिका रहेका ‘हिमाल’ बचाउनका लागि विश्वसमुदाय एकजुट हुन आवश्यक भएको बताएका हुन्। 

Watch On

उनले जलभण्डारणका रुपमा रहेको हाम्रा हिमाल अहिले अत्यन्त सङ्कटमा रहेको उल्लेख गर्दै विश्वालाई जलवायु अनुकूलित बनाउन सहयोग पुर्‍याउने हिमाल बचाउनका लागि विश्व समुदायसँग अनुरोध गरेका छन् । प्रधानमन्त्री ओलीले भने, “जसले सबैभन्दा बढी प्रदूषण गर्छन् उनीहरूले नै सबैभन्दा बढी योगदान दिनुपर्छ, उनीहरूले संवेदनशील राष्ट्रहरूलाई वित्त, प्रविधि र क्षमता अभिवृद्धिमार्फत सहयोग गर्नुपर्छ ।” 

त्यस्तै उनले हिमाल जोगाउनु भनेको पृथ्वी जोगाउनु भएको बताए । उनले भने, ‘हिमाल जोगाउनु भनेको पृथ्वी जोगाउनु हो । हिमाल जोगाउनु भनेको महासागरहरू जोगाउनु हो । हिमाल जोगाउनु भनेको स्वयं मानवता जोगाउनु हो ।’

विश्वका विभिन्न तीन दर्जनभन्दा बढी मुलुकका प्रतिनिधि र विश्व बैंक, एसियाली विकास बैंक, बिम्स्टेक, सार्कलगायत क्षेत्रीय र बहुपक्षीय अन्तरराष्ट्रिय ६१ सङ्घसंस्थाका प्रतिनिधिसमेतको सहभागिता रहेको ‘सगरमाथा संवाद’ तीन दिनसम्म सञ्चालन हुनेछ ।