सिधाकुरा फलोअप : टिकटकमा चरित्रहत्या गर्ने रविन्द्रविरुद्ध प्रहरीमा उजुरी दर्ता

११ भदौ,काठमाडौं- दुबईमा बसेर सामाजिक संजाल टिकटकमा आफ्नै परिवारको चरित्रहत्या गर्ने मनशायले अश्लील अडियोमा भिडियो बनाउने नुवाकोटका रविन्द्र सापकोटाविरुद्ध जिल्ला प्रहरी कार्यालय नुवाकोटमा उजुरी दर्ता भएको छ । 

Watch On

नुवाकोट जिल्ला किस्पाङ गाउँपालिका २ सल्लेका रविन्द्र सापकोटाले आफ्नै श्रीमति, दिदी सासु र सालीको समेत फोटो अश्लिल अडियोमा राखेर भिडियो बनाउने गरेका थिए । वैदेशिक रोजगारीका लागि विदेशको भूमिमा रहेका उनलाई त्यस्तो नगर्न पटक–पटक आग्रह गर्दा समेत आफूलाई कसैले केही गर्न नसक्ने भन्दै उल्टै धम्की दिने गरेका थिए । 

रविन्द्रको हर्कत सहन नसकेर उनलाई कारबाहीको माग गर्दै शान्ति र रमा (परिवर्तित नाम) विभिन्न निकाय धाइरहेका थिए । न्यायको माग गर्दै नुवाकोटदेखि काठमाडौंमा रहेको साइबर ब्यूरो केन्द्रीय कार्यालय आएका उनीहरुको समस्या जिल्ला प्रहरी कार्यालयबाट नै समाधान हुने भन्दै फर्काइएको थियो । 

साइबर ब्यूरोले भनेअनुरुप नै जिल्ला प्रहरी कार्यालय नुवाकोट पुगेका उनीहरुलाई विभिन्न बहनामा उनीहरुको निवेदन मात्र लिइएको थियो । प्रहरीले उजुरी भने लिन मानेको थिएन । 

रविन्द्रका कारण शान्ति, रमा र चाँदनीले भोगेको शारीरिक र मानसिक यातनाका विषयमा सिधाकुरामा समाचार प्रकाशन र प्रसारण भएपछि भने रविन्द्रविरुद्धको उजुरी जिल्ला प्रहरी कार्यालय नुवाकोटमा दर्ता भएको छ । 

जिल्ला प्रहरी कार्यालय नुवाकोटको मुद्दा फाँटका प्रहरी अधिकृतका अनुसार प्रहरीमा रविन्द्रको विरुद्धमा उजुरी दर्ता हुनुका साथै उनको सामाजिक सञ्जाल निस्क्रिय पार्नसमेत साइबर ब्यूरो केन्द्रीय कार्यालयमा पठाइसकेको छ । प्रहरीमा उजुरी दर्ता भएसँगै पीडितहरु आफूहरुले न्याय पाउनेमा आशा पलाएको बताएका छन् ।