रास्वपा सभापति लामिछाने भारत भ्रमण सकेर स्वदेश फिर्ता

काठमाडौँ । राष्ट्रिय स्वतन्त्र पार्टीका सभापति रवि लामिछाने भारतको पाँच दिन लामो भ्रमण पुरा गरी आज स्वदेश फर्किएका छन् । 
हिजो साँझ अयोध्या पुगेका लामिछाने आज अध्योध्याबाट दिल्ली हुँदै काठमाडौँ आइपुगेका हुन् । उनी केहीबेर अघि त्रिभुवन अन्तर्राष्ट्रिय विमानस्थलमा ओर्लेका छन् ।

भारतीय जनता पार्टीका अध्यक्ष नितिन नवीनको निमन्त्रणामा पाँच सदस्यीय प्रतिनिधि मण्डलको नेतृत्व गदै लामिछाने जेठ १८ गते नयाँ दिल्ली पुगेका थिए ।

Watch On

भारत भ्रमणका क्रममा लामिछानेले जेठ १९ गते दिनदयाल मार्गस्थित भाजपाको मुख्यालयमा भाजपा अध्यक्ष नवीनसँग भेटवार्ता गरेका थिए भने सोही दिन भारतीय गृहमन्त्री अमित शाह र विदेशमन्त्री एस जयशंकरसँग भेटवार्ता गरेका थिए ।

त्यस्तै जेठ २० गते लामिछानेले भारतीय प्रधानमन्त्रीको कार्यालय हैदरावाद हाउसमा प्रधानमन्त्री नरेन्द्र मोदीसँग भेटवार्ता गरे । 
हिजो नयाँ दिल्लीमा प्रवासीहरुलाई सम्बोधन गरेर लामिछाने साँझ अयोध्या पुगे । आज बिहान उनले त्यहाँस्थित राम मन्दिरको दर्शन गरे ।

नेपालमा फागुन २१ को चुनावपछि नेपालबाट भारतमा भएको यो सबैभन्दा उच्च भ्रमण हो ।

रास्वपा सभापति रवि लामिछानेको भारत भ्रमणलाई भारतले उच्च महत्व दिएको चर्चा भइरहेको छ ।

भ्रमणका दौरान भएका सबै भेटमा लामिछानेले दुई देशबीचको सम्बन्ध थप मजबुद बनाउने र दुई देशका बीचमा विकास साझेदारी गर्ने लगायतका विषयमा छलफल गरेका थिए ।