राजा महेन्द्रले ‘स्वर्गकी अप्सरा’ मानेको ताल

मुगु । बादलको घुम्टो उघारेर नीलो आकाशले धर्ती चियाउँदा राराको सौन्दर्य कुनै स्वप्निल संसारभन्दा कम देखिँदैन। चारैतिर हरियालीले ढाकिएका डाँडापाखा, शान्त वातावरण र ऐनाझैँ टल्किने नीलो पानी। त्यही पानीमा डाँडाहरूको छाया पर्दा प्रकृतिले आफ्नै सुन्दर चित्र कोरेझैँ लाग्छ। नेपालको प्राकृतिक सौन्दर्यको अनुपम गहना रारा ताल यतिबेला पर्यटकलाई स्वागत गर्न तल्लीन छ।

Watch On

वर्षायाम बिदाबारी भएर दसैँ–तिहारसँगै घुमफिरको मौसम सुरु भएपछि मुगुस्थित रारा तालमा पर्यटकको चहलपहल बढ्न थालेको छ। प्रकृतिको काखमा केही समय हराउन चाहने आन्तरिक तथा बाह्य पर्यटक राराको अनुपम सौन्दर्य नियाल्न पुग्न थालेका छन्।

समुद्री सतहबाट करिब दुई हजार ९९० मिटरको उचाइमा अवस्थित रारा ताल १०.८ वर्ग किलोमिटर क्षेत्रफलमा फैलिएको छ। करिब १६७ मिटर गहिराइ रहेको यो तालले नेपालको सबैभन्दा ठूलो तालको परिचय पाएको छ। यसको नीलो पानी, वरिपरिका हरिया पहाड र बदलिरहने प्राकृतिक रङले रारालाई हरेक मौसममा फरक र मनमोहक बनाउँछन्।

कहिले आकाशको नीलोपन आफैँमा समेट्छ त कहिले वरिपरिका पहाडको हरियालीलाई आफ्नो कञ्चन छातीमा सजाउँछ। हावाको हल्का स्पर्शसँगै पानीमा उठ्ने ससाना तरङ्गले दृश्यलाई अझ जीवन्त बनाउँछ। राराको किनारमा पुग्नेहरूलाई प्रकृतिको यो मौन सौन्दर्यले केहीबेर भए पनि संसारका कोलाहल बिर्साइदिन्छ।

राराको यही अनुपम सुन्दरताबाट मोहित भएर राजा महेन्द्रले यसलाई ‘स्वर्गकी अप्सरा’सँग तुलना गरेका थिए। उनले राराको सौन्दर्य वर्णन गर्दै कवितासमेत लेखेका थिए। २०२० सालको अन्त्यतिर राजा महेन्द्रले रारा भ्रमण गरेपछि यस तालले राष्ट्रियस्तरमा थप चर्चा पाएको थियो। कुनै समय उनको भ्रमणकै कारण रारा ताललाई ‘महेन्द्र ताल’ नामकरणसमेत गरिएको थियो।

आज पनि रारा पुग्ने पर्यटकका लागि यसको सौन्दर्य शब्दमा वर्णन गर्नुभन्दा आँखाले नियाल्नु र मनले अनुभूत गर्नु बढी अर्थपूर्ण हुन्छ। हिमाली प्रकृतिको काखमा शान्तसँग फैलिएको रारा साँच्चै यस्तो गन्तव्य हो, जहाँ पुगेपछि लाग्छ—स्वर्गको सुन्दरता हेर्न कल्पनाको सहारा लिनुपर्दैन।

तस्बिरः अर्जुन गाहा/नेपाल फोटो लाइब्रेरी