तस्बिरकी लक्ष्मी मात्र होइन, घर–समाजकी लक्ष्मीलाई पनि सम्मान गरौँ : मुख्यमन्त्री थापा मगर

काठमाडौं, २२ कात्तिक । बागमती प्रदेशका मुख्यमन्त्री किरण थापा मगरले लक्ष्मीपूजालाई महिला सम्मान र नारी शक्तिको महत्त्वसँग जोड्दै घरपरिवार र समाजमा रहेका महिलालाई पनि उत्तिकै आदर र सम्मान गर्न आग्रह गरेका छन् ।

Watch On

लक्ष्मीपूजाको अवसरमा शुभकामना सन्देश जारी गर्दै उनले तस्बिरमा सजिएकी लक्ष्मीको पूजा गरेर मात्र नहुने भन्दै व्यवहारमा पनि महिलाको सम्मान गर्नुपर्ने बताएका हुन् ।

‘तस्बिरकी लक्ष्मीको पूजा मात्र होइन, घर–समाजकी लक्ष्मीलाई पनि आदर–सम्मान दिनुहोस्,’ उनले भनेका छन् ।

संसारका तीन प्रमुख शक्ति बल, विद्या र धन रहेको उल्लेख गर्दै मुख्यमन्त्री थापा मगरले ती तीनै शक्तिको प्रतीकका रूपमा स्त्री स्वरूपलाई लिइने गरेको बताएका छन् । बलकी प्रतीक पार्वती, विद्याकी प्रतीक सरस्वती र धनकी प्रतीक लक्ष्मीको उदाहरण दिँदै उनले नारी शक्तिको महत्त्व उजागर गरेका छन् ।

‘स्त्री शक्ति कमजोर छैन, कमजोर छ त केवल हामीभित्रको दृष्टिकोण र मानसिकता,’ उनले भनेका छन्, ‘त्यसैले आफ्नो मनोबल उच्च राखौँ, स्त्री शक्तिको सम्मान गरौँ ।’

दसैँमा शक्तिको उपासना गरेर पर्व मनाएपछि तिहारमा लक्ष्मीको उपासना गर्ने परम्परालाई स्मरण गराउँदै उनले धार्मिक आस्था र व्यवहारबीच समानता हुनुपर्ने बताएका छन् ।

उनले शुभकामना सन्देशमा मनुस्मृतिको श्लोकसमेत उद्धृत गरेका छन् ।

‘यत्र नार्यस्तु पूज्यन्ते रमन्ते तत्र देवताः ।
यत्रैतास्तु न पूज्यन्ते सर्वास्तत्राफलाः क्रियाः ।।’

यसको अर्थ जहाँ नारीको सम्मान हुन्छ, त्यहाँ देवताको बास हुन्छ र जहाँ नारीको सम्मान हुँदैन, त्यहाँ गरिएका सबै कर्म निष्फल हुन्छन् भन्ने रहेको उनले उल्लेख गरेका छन् ।

महिला सम्मानलाई धार्मिक अनुष्ठान र औपचारिक शुभकामनामा मात्र सीमित नराखी दैनिक जीवन र सामाजिक व्यवहारमा समेत उतार्नुपर्ने सन्देश दिँदै मुख्यमन्त्री थापा मगरले तिहारलाई नारी सम्मान र उत्थानको अवसरका रूपमा लिन आग्रह गरेका छन् ।

उनले लक्ष्मीपूजाको अवसरमा समस्त नेपालीमा सुख, शान्ति र समृद्धिको कामनासहित शुभकामना व्यक्त गरेका छन् ।