संसद्‍मा विपक्षीको अवरोधः प्रधानमन्त्रीको अभिव्यक्ति प्रधानमन्त्रीले नै सच्याउन विपक्षीको माग

काठमाडौँ । सीमाका विषयमा प्रधानमन्त्री बालेन शाहको अभिव्यक्तिलाई विपक्षी दलहरुले आज पनि प्रतिनिधिसभाको बैठकमा अवरोध गरेका छन् ।

सभामुख डीपी अर्यालले बैठकको कारबाही सुरु गर्नासाथ विपक्षी दलका सांसदहरु उठेर अवरोध गरेका थिए । सभामुखले सबै विपक्षी दलका सांसदहरुलाई बोल्न समय दिए । तर, पनि विपक्षी दलहरुले बैठकलाई कायृसूचीमा प्रवेश गर्न दिएनन् । त्यसपछि सभामुखले १५ मिनेटका लागि बैठक स्थगित गरेको घोषणा गरे ।

Watch On

त्यसअघि नेकपा एमालेकी संसदीय दलको उपनेता पद्मा अर्यालले प्रधानमन्त्रीले सदनमा आएर माफी नमागेसम्म सदन चल्न नदिने बताइन् ।

उनले लिपुलेक, लिम्पियाधुरा र कालापानी क्षेत्र नेपालको अभिन्न भूभाग भएकाले बिना शर्त फिर्ता हुनुपर्ने बताइन् । ‘यो कुनै एउटा प्रतिपक्षको विषय मात्रै होइन, यो ३ करोड नेपाली जनताको विषय हो, हामी सबैको साझा विषय हो। त्यसैले यो सम्मानित सभाबाट भूल सुधार गरौँ, हामी सबै एकताबद्ध बनौँ, राष्ट्रियताको मामिलामा पक्ष–विपक्ष हामी नहोऔँ। हामी एकताबद्ध भएर भूल सुधार गर्दै हाम्रा तर्फबाट सभामुख महोदयले त्यसको नेतृत्व गर्नुस्, एउटा राष्ट्रिय सङ्कल्पको प्रस्ताव पारित गरौँ। यो संसद्मा उपस्थित गराएर क्षमायाचनासहित त्यो रेकर्ड हटाउने काम गरौँ।’

त्यस्तै श्रम संस्कृति पार्टीका अध्यक्ष हर्क साम्पाङले पनि प्रधानमन्त्रीको अभिव्यक्ति अविलम्ब सच्चाइनुपर्ने बताए । 
‘सिमानाको बारेमा हाम्रो देशले छिमेकी मुलुकलाई कहाँ–कहाँ अतिक्रमण गरेको रहेछ, प्रधानमन्त्रीले पुष्टि गर्नु पर्छ। नेपाली जनतालाई सम्बोधन गरेर उहाँले त्यो आफ्नो भनाइलाई सच्याउनुपर्छ।’

उनले प्रधानमन्त्रीले सट्टा अरूले जवाफ दिएर नहुने अडान सुनाए।

आजको बैठकमा विपक्षी दलका सांसदहरुले आर्थिक विधेयकमा अर्थमन्त्रालयले गरेको करको दर हेरफेरको विषय पनि उठाए । 
एमाले संसदीय दलका उपनेता पद्मा अर्यालले आर्थिक विधेयकका विषय नै गायव भएको बताइन् । ‘आर्थिक विधेयकको १६ पृष्ठ गायब भयो । करका दर हेरफेर भएको छ,’ अर्यालले भनिन् ।

रास्वपा सांसद शाहीले पनि करको दर हेरफेर गर्ने काम कसरी भयो भनेर प्रश्न गरे ।