रास्वपामा बहालवाला सांसदहरु नै पराजित

काठमाडौँ । राष्ट्रिय स्वतन्त्र पार्टीको जारी प्रदेश अधिवेशनमा बहालवाला सांसदहरु नेतृत्वमा पुग्न असफल भएका छन् । 

रास्वपाको केन्द्रीय निर्वाचन आयोगकाअनुसार बागमती, गण्डकी र लुम्बिनी प्रदेशको अधिवेशनमा सभापति पदमा उठेका तीन जना सांसद पराजित भएका हुन् भने एकजना सांसदले उम्मेदवारी नै फिर्ता लिए । तीन मध्ये दुईजना नेतृत्वमै थिए । फेरि सभापतिमा दोहोरिन खोजेका थिए । 

Watch On

बागमतीको प्रदेश सभापतिबाट प्रतिस्पर्धा गरेका निवर्तमान सभापति एवं नुवाकोट २ का प्रतिनिधिसभा सदस्य डा. अच्युतम लामिछाने २ मतले पराजित भए । यहाँ काभ्रे–२ बाट निर्वाचित सांसद बदन भण्डारीले पनि उम्मेदवारी दिएकामा पछि फिर्ता लिएका थिए । सांसद लामिछानेलाई मकवानपुरका उत्सव अर्यालले ४१६ मतसहित पराजित गरेका हुन् । लामिछानेले ४१४ मत प्राप्त गरेका थिए । 

गण्डकीको सभापतिमा निवर्तमान सभापति एवं नवलपुरबाट निर्वाचित सांसद राजन गौतम ५२ मत अन्तरले पराजित भए । प्रतिस्पर्धी नवीन त्रिपाठी २३४ मत ल्याएर सभापति निर्वाचित भए भने गौतमले १८२ मत पाएका थिए ।

लुम्बिनीको सभापतिमा सांसद मञ्जु ज्ञवाली भुसाल पराजित भएकी छिन् । उनी पहिलो चरणमै बाहिरिएकी हुन् । पहिलो चरणमा सबैभन्दा बढी मत ल्याएका शालिकराम घिमिरे दोस्रो चरणमा सभापति निर्वाचित भए । 

कोशीमा निवर्तमान सभापति गोमा तामाङ सरिन सभापतिमा पराजित भएपछि पार्टी नै छोडेकी छिन् । यहाँ चन्द्रबहादुर राई सभापति निर्वाचित भएका छन् । 

केन्द्रीय निर्वाचन विभाग प्रमुख भुवन केसीले चार प्रदेशको अधिवेशन सम्पन्न भई नेतृत्व चयन भएको जानकारी दिँदै कर्णाली र सुदूरपश्चिमको अधिवेशन भइरहेको बताए । मधेशको अधिवेशन विवादले रोकिएको र महाधिवेशनपछि हुने उनले बताए ।