ठेकेदारको खुट्टा भाँच्नु भन्ने अभिव्यक्तिपछि विवादमा पूर्वाधार विकासमन्त्री सुनिल लम्साल

काठमाडौँ । पूर्वाधार विकासमन्त्री सुनिल लम्सालको अभिव्यक्ति अहिले चर्चामा छ । उनले ठेकेदारको खुट्टा भाँच्नु भनी दिएको अभिव्यक्तिका कारण उनको चर्को आलोचना भईरहेको छ । यद्यपी काम नगर्ने ठेकेदारको प्रवृत्तिबाट आजितहरुले भने उनको भनाइको समर्थन पनि गरिरहेका छन् । 

आइतबार नागढुंगा–मुग्लिङ सडक योजनाको निरीक्षण गर्ने क्रममा मन्त्री लम्सालले भनेका थिए, ‘यिनीहरूको यो जुन पोल छ, बिजुलीको पोलको कन्ट्र्याक्टर कहाँ छ ? यो धर्तीमा कहाँ छ ? त्यसलाई खोजेर यहाँ लिएर आउनु । त्यसलाई पनि यहाँ राख्नु । घर पठाउने होइन । त्यसले काम गरेन भने खुट्टा भाँचिदिनु, मतलब भएन ।’ 

Watch On

मन्त्री लम्साल बुटवलबाट सडक तथा निर्माणधिन पूर्वाधारहरुको निरीक्षण गर्दै आइतबार काठमाडौँ फर्केका थिए । आइतरबार नै भएको नागढुंगा–मुग्लिङ सडक निरीक्षणमा मन्त्रालयका सचिव गोपालप्रसाद सिग्देल, धादिङकी प्रमुख जिल्ला अधिकारी लक्ष्मी पाण्डेय र प्रहरी उपरीक्षक सुमित खड्का लगायत सँगै थिए ।

सो क्रममा मन्त्री लम्सालले विजुलीको पोल नहट्दा काम हुन नसकेको र जनताले धेरै दुःख पाएको उल्लेख गरेका थिए । उनले भनेका थिए, ‘यिनीहरूले चाँडै भन्दा चाँडै पोल सार्न पर्‍यो । यहाँको पब्लिकले धेरै दुःख पायो। उनीहरूलाई काम गर्न लगाउन पर्‍यो राम्रोसँग ।’ 

नागढुंगा–मुग्लिन सडक योजनाका अधिकारीका अनुसार सडक विभाग र नेपाल विद्युत प्राधिकरणबीच विजुलीका पोल सार्नका लागि ३ वर्षअघि नै  सम्झौता भएको थियो । तर अहिलेसम्म पोल सारिएको छैन । नागढुंगा–मुग्लिन सडक योजनाको पश्चिम खण्डमा १०७  र  पूर्वी खण्डमा ८० बढी पोल सार्न बाँकी छ ।