बन्द भयो काठमाडौँ आउन मेलम्चीको पानी

काठमाडौँ । मेलम्चीको पानी काठमाडौँ आउन बन्द भएको छ । वर्षातका कारण मेलम्ची नदीमा बाढी आएपछि काठमाडौँ ल्याइएको पानी बन्द गरिएको हो ।

काठमाडौँ उपत्यका खानेपानी लिमिटेड (केयुकेएल) का प्रवक्ता वीरबहादुर चन्दका अनुसार मेलम्चीको मुहानमा पानी धमिलो भएपछि प्रशोधन प्रक्रिया जटिल हुँदा मेलम्चीबाट सुन्दरीजलस्थित प्रशोधन केन्द्रमा प्रवाह  हुने पानीको आपूर्ति अस्थायी रूपमा रोकिएको हो ।

Watch On

उनले भने, ‘वर्षाले बाँध क्षेत्रमा पानी धमिलो भएको छ, गुणस्तरमा सुधार आएपछि पुनः प्रशोधन प्रक्रिया सञ्चालन गरी पूर्वनिर्धारित वितरण तालिकाअनुसार पानी आपूर्ति सञ्चालन गरिनेछ ।’

२०७८ असार १, साउन १६ र १७ गते गएको भेलबाढीले मेलम्ची खानेपानी आयोजनाको बाँध क्षेत्र बगरमा परिणत गरेको थियो। सुरुङलगायत संरचनामा क्षति पर्याएपछि काठमाडौँमा अस्थायीरुपमा पानी ल्याइएको थियो ।

हाल बाँध क्षेत्रमा रहेको डाइभर्सन सुरुङ मार्फत हिउँद याममा मात्र पानी पथान्तरण गर्ने गरिएको छ । वर्षामा नदीको सतह बढ्नासाथ आयोजनाले सुरुङ बन्द गर्ने गरेको छ ।

मेलम्चीको पानी बन्द भएपछि काठमाडौँ उपत्याकाको खानेपानीको माग बागमती नदी लगायत उपत्यकाका आसपासका मुहानबाट धान्ने गरिएको छ । गत वर्ष बागमतीको मुहान क्षेत्रमा रहेको धाप ड्याममा संकलन गरिएको पानी नागमतीमा बगाएर पनि व्यवस्थापन गरिएको थियो ।