संसदबाट निस्किने बेला प्रधानमन्त्री र पूर्वउपसभामुख जम्काभेट, ८० वर्षीय वृद्धको सन्देशले बालेन गम्भीर

काठमाडौँ । प्रधानमन्त्री बालेन्द्र शाह मंगलबार प्रतिनिधि सभा बैठक चलिरहेकै बेला संसद भवन पुगे । त्यहाँ उनले सभापति रबि लामिछानेसँग भेट गरे । बैठकमा २० मिनेट बसेर बाहिरिए । बाहिरिने क्रममा ढोकामै पूर्वउपसभामुख इन्दिरा राना मगरसँग जम्काभेट भयो । बालेनले सोधे, के छ सञ्चै हुनुहुन्छ ? ठाडै शैलीमा बोल्ने इन्दिराले के हुनु, ठिकै छ भन्दै झापा क्षेत्र नम्बर २ का ८० वर्षीय वृद्धको पीडासहितको सन्देश सुनाइन् । साथमै थिइन् झापा १ बाट निर्वाचित सांसद निशा डाँगी । त्यसो त प्रधानमन्त्री शाह आफै झापा ५ बाट निर्वाचित सांसद हुन् । 

८० वर्षीय वृद्धले आफू गम्भीर विरामी परेको, हेरचाहका लागि छोरा आवश्यक परेको बेला शाखा अधिकृत रहेका छोरालाई बैतडी सरुवा गरिएको भन्दै इन्दिरासँग हारगुहार गरिरहेका छन् । '८० वर्षको वृद्ध बुवाले मेरो छोरालाई घरपायक गरिदिनुस् भनेर भनेको भन्यै हुनुहुन्छ । त्यही कुरा मैले प्रधानमन्त्रीज्यूलाई सुनाएको हो,' सांसद रानामगरले भनिन् । 

Watch On

८० वर्षका वयोवृद्ध बाबुका छोरा हुन् उत्तम कटुवाल । जो गृह मन्त्रालयका काम गर्थे । उनलाई अहिले जिल्ला प्रशासन कार्यालय बैतडी सरुवा गरिएको छ । सांसद रानामगरले कटुवालको घरायसी बाध्यताबारे गृहसचिवसँग पनि कुरा गरेकी थिइन् । तर उनले आफूले यो सम्बोधन गर्न नसक्ने र प्रधानमन्त्री कार्यालयमा सम्पर्क गर्न भनेका थिए । सांसद रानामगर त्यसपछि मंगलबार दिउँसो प्रधानमन्त्री कार्यालय पुगिन् । जति बेला प्रधानमन्त्री संसदका लागि निस्किरहेका थिए । सांसद रानाले प्रधानमन्त्रीका स्वकीय सचिवलाई फोन गरेर भेट्न खोजिन् । तर स्वकीय सचिव सम्पर्कमा आएनन् ।

उनी रित्तै हात संसद फर्किइन् । त्यही बेला बाहिरिरहेका प्रधानमन्त्री शाहसँग उनको ढोकामै जम्काभेट भयो । अनि प्रधानमन्त्रीले सोधिहाले, के छ दिदी खबर, सञ्चै हुनुहुन्छ । त्यसैबेला सांसद रानामगरले ८० वर्षीय वृद्धको पीडाको पोको फुकाउँदै प्रधानमन्त्रीसँग राखिन् । 

प्रधानमन्त्री शाहले आफूसँगै रहेका आफ्ना निजी सचिव सहसचिव प्रदीप परियारलाई 'दिदीको काम तुरुन्त गरिदिनु है' भनेर निर्देशन दिए । सांसद रानामगरले ८० वर्षीय विरामी वृद्धको समस्यालाई प्रधानमन्त्री शाहले गम्भीरतापूर्वक लिएर समाधानका लागि अग्रसरता लिएको बताइन् ।