१६ वर्षपछि उपाधि जित्दा स्पेनको नयाँ युगको सुरुआत

काठमाडौं । युवा खेलाडीको साथ पाएको स्पेनले १६ वर्षपछि आफ्नो नयाँ युगको विस्तार गरेको छ । सोमबार बिहान अमेरिकाको न्युयोर्कस्थित न्यु जर्सी मैदानमा स्पेनले साविक विजेता अर्जेन्टिनाको चुनौती १–० ले पाखा लगायो र आफ्नो जर्सीमा दोस्रो तारा थप्न सफल भयो ।

सन् २०१० पछि स्पेनलाई च्याम्पियन बनाउन फेरान टोरेजले निर्णायक गोल गरेका थिए । निर्धारित ९० मिनेटको खेलमा दुवै टोलीले गोल गर्न सकेनन् । एन्जो फर्नान्डेजले रातो कार्ड पाएपछि अर्जेन्टिना १० खेलाडीमा सीमित बन्यो । त्यसको फाइदा स्पेनले लियो ।

Watch On

खेलभर ६५ प्रतिशत बल पोसेसन राखे पनि स्पेनले गोलका लागि भने निकै संघर्ष गर्नुपर्‍यो । बार्सिलोनाका स्टारले खेलको १०६औँ मिनेटमा गोल गरेका थिए । खेल पूर्ण रूपमा स्पेनले आफ्नो पक्षमा पार्‍यो । अर्जेन्टिनाले खेलभर दुई सशक्त प्रहार गर्दा स्पेनले २० पटक गोलको अवसर बनायो । तर, गोलकिपर इमिलियानो मार्टिनेजले स्पेनका लगातारका प्रहार विफल बनाएका थिए । उनले ११ प्रहार रोकेका थिए ।

विश्व फुटबलमा नयाँ युग सुरु भएको र आफ्नो अधिपत्य स्थापित भएको सन्देश यसले दियो । स्पेनले पुनः युरोपेली फुटबलमा आफ्नो दबदबा रहने प्रष्ट जानकारी गरायो । युवा पुस्ताले आगामी दिनमा स्पेनको फुटबल हाँक्ने प्रष्ट सन्देश दिएको छ । घरेलु लिग 'ला लिगा' खेलिरहेका अधिकांश खेलाडी समावेश गरेको स्पेनले योसँगै ला लिगाको ब्रान्डलाई झनै सशक्त बनाएको छ ।

शानदार बल नियन्त्रण, हाइ प्रेसिङ गेम, तीव्र गति र अनुशासित खेलका कारण स्पेनले उपाधि दाबेदार टोलीलाई पराजित गर्न सफल भयो । फाइनलमा विश्व नम्बर एक अर्जेन्टिनालाई हराएर 'टप अफ द वर्ल्ड' मा आफूलाई उभ्यायो । सेमिफाइनलमा फ्रान्सजस्तो खतरनाक अट्याकर भएको टोलीलाई निरीह बनायो र २–० ले विजयी भयो । क्वार्टरफाइनलमा बेल्जियमको चुनौती २–१ ले पाखा लगायो । यस्तै, प्रि–क्वार्टरफाइनलमा क्रिस्टियानो रोनाल्डो कप्तान रहेको पोर्चुगललाई पनि १–० ले पराजित गरेको हो ।

सन् २०१० मा च्याम्पियन भएपछि स्पेनले लगातार कमजोर प्रदर्शन गर्‍यो । सन् २०१४ मा समूह चरणबाट माथि बढ्नै सकेन । पछिल्लो दुई संस्करण पनि अन्तिम १६ बाट माथि बढ्न नसकेपछि स्पेनिस फुटबलले युवा खेलाडीलाई प्रवद्र्धन गर्‍यो । टोलीमा केही मात्र अनुभवी खेलाडी समावेश गरेर युवा खेलाडीलाई मौका दिइयो ।

यो रणनीतिमा प्रशिक्षक लुइस फुइन्टे सफल देखिए । सन् २०१० मा जस्तै युरोकप उपाधि हुँदै विश्वकपमै उपाधि जिताउन उनी सफल भएका छन् । स्पेनले एकपटक पुनः २०१० कै झल्को दिने गरी खेल खेल्यो । सन् २०१० को फाइनलमा पनि स्पेनले नेदरल्यान्ड्सको चुनौती १–० ले पाखा लगाएको थियो । मिडफिल्डर आन्द्रेस इनिएष्टाले ११६औँ मिनेटमा निर्णायक गोल गरेका थिए । यसपटक सोही क्रम दोहोरियो ।

फाइनलसँगै स्पेनले लगातार ३८ खेलमा अपराजित यात्रा कायम राखेको छ, जसमा २९ जित र ९ बराबरी रहेको छ । योसँगै स्पेनले इटालीको ३७ खेलको अपराजित यात्रा भङ्ग गरेको हो । यसअघि अर्जेन्टिनाले पनि यस्तै कीर्तिमान बनाएको थियो, त्यसलाई समेत स्पेनले भङ्ग गरेको छ ।

यता, स्पेनका गोलकिपर उनाइ सिमोनले फाइनलसहित ८ खेल खेल्दा सात खेलमा ‘क्लिन सिट’ राखे । सिमोन विश्वकपकै उत्कृष्ट गोलकिपर हुँदै ‘गोल्डेन ग्लोभ्स’ जित्न सफल भए ।

स्पेनका १९ वर्षीय डिफेन्डर उत्कृष्ट युवा प्रतिभावान खेलाडी चुनिए । उनीसँगै स्पेनले लामिन यमल, पाब्लो गाभी, निको विलियम्स, एरिक गार्सिया, पेड्री, एलेक्स बाइना लगायत युवा खेलाडीलाई टोलीमा समावेश गरेको थियो । यी सबै खेलाडीले आफूलाई प्रमाणित गरे । यता, ३० वर्षीय कप्तान रोड्री, फावियन रुइज, ऐमेरिक लापोर्टे, मार्क कुकुरेला, डानी ओल्मो, मिकेल ओयर्जाबाल जस्ता खेलाडीले टोलीको प्रदर्शनमा सुनमा सुगन्ध थपे । विश्वकपभरि मिडफिल्डमा शानदार प्रदर्शन गरेका कप्तान रोड्रीले गोल्डेन बल हात पारे ।

यता, २२ खेलमा २२ गोल गरेर कीर्तिमान बनाएका केलिएन एम्बाप्पेले गोल्डेन बुट जिते । उनी विश्वकप इतिहासमा सन् २०२२ र सन् २०२६ मा लगातार गोल्डेन बुट जित्ने एक्ला खेलाडी भए । यस विश्वकपमा उनले १० गोल गरेका हुन् । अर्जेन्टिनाका कप्तान लियोनल मेसीले ८ गोल गरेका थिए । मेसीलाई फाइनल खेलमा २ गोल गरे मात्र गोल्डेन बुट र सर्वाधिक गोलकर्ताको शीर्ष स्थानमा उक्लने अवसर थियो, जुन पूरा हुन सकेन ।