पहिलो महाधिवेशनबाट नयाँ नीति र नेतृत्व लिएर आएको रास्वपा अहिले के गर्दैछ ?

काठमाडौँ । चितवनको पहिलो राष्ट्रिय महाधिवेशनबाट नयाँ नीति र नेतृत्व लिएर आएको राष्ट्रिय स्वतन्त्र पार्टी नीतिगत आधार निर्माणमा जुटेकाे छ । 

महामन्त्री विपिन आचार्यले महाधिवेशनबाट संशोधन भएको विधानअनुसार कार्यविधि र नियमावली लेखन भइरहेको बताए ।

Watch On

‘पहिला त हामी जति पनि कार्यविधि र नियमावली नयाँ बनाउनुपर्ने, संशोधन गर्नुपर्नेछ, त्यो काम गर्दै छौँ । चाहे त्यो बैठक सञ्चालन कार्यविधि होला, पार्टी सदस्यता प्रमाणीकरण गर्ने कार्यविधि होला । विभागहरूको कार्यविधि छ । अथवा अस्तिको विधानभन्दा अगाडिसम्म पार्टीको संरचनामा परिषद्का कुराहरू थिए । अहिले हामीले बुथ र टोल समितिलाई बढी इन्स्ट्रुमेनलाइज गरेका छौँ । पहिला ३९ वटा विभाग थियो, अहिले ३० भन्दा तल झारेका छौँ,’ आचार्यले भने । 

महामन्त्री आचार्यले मनोनीत गरिने पदाधिकारीहरु पनि पूर्ति गरिने बताए । चाँडै बैठक बसेर पदाधिकारीसहित केन्द्रीय समितिलाई पूर्णता दिने उनको भनाइ छ । पार्टीको विभाग र अन्य संरचनालाई पूर्णता दिने काम पनि भइरहेको आचार्यले बताए । उनका अनुसार नवनिर्वाचित केन्द्रीय सदस्यलाई अभिमुखीकरण दिने योजना पनि बनिरहेको छ ।

‘त्यो योजना बन्दासम्म मनोनीत पनि सकिसक्छ,’ उनले भने, ‘सबैजनालाई एकैसाथ अभिमुखीकरण हुन्छ ।’ महामन्त्री आचार्यका अनुसार नवनिर्वाचित केन्द्रीय समितिको बैठक पनि आउँदो साता बस्ने गरी गृहकार्य भइरहेको छ । त्यही बेला सभापति रवि लामिछानेले मनोनीतहरूको नाम बैठकमा पेस गर्न सक्छन् । 

नीतिगत आधार तयार पारेपछि पार्टी सरकारलाई सफल बनाउन लाग्ने, संसदमा सक्रिय भूमिका निर्वाह गर्ने र जनसंगठन विस्तार गर्दै आसन्न स्थानीय तह र प्रदेश सभाको निर्वाचनमा जुट्ने महामन्त्री आचार्यले बताए ।