सातै प्रदेश भागबण्डाको अन्तिम तयारीमा एमाले–नेकपा

काठमाडौँ । नेकपा एमाले र नेपाली कम्युनिस्ट पार्टी (नेकपा) बीच सातै प्रदेशमा मिलेर सरकार बनाउने सहमतिको अन्तिम तयारीमा जुटेका छन् । एमाले अध्यक्ष केपी शर्मा ओली र नेकपा संयोजक पुष्पकमल दाहाल ‘प्रचण्ड’ अहिले पनि छलफलमा छन् ।

दुई नेताबीच चार वटा प्रदेश सरकारको नेतृत्व एमालेले गर्ने र तीन वटा प्रदेशमा नेकपाले सरकारको नेतृत्व गर्ने गरी भागबण्डा भइसकेको स्रोतको दाबी छ । सहमतिलाई अन्तिम रुप दिन मात्रै बाँकी रहेको स्रोतको दाबी छ ।

Watch On

स्रोतका अनुसार कोशी, बागमती, लुम्बिनी र गण्डकीमा एमालेले मुख्यमन्त्री लिने छ भने कर्णाली, सुदूरपश्चिम र मधेसमा नेकपाले मुख्यमन्त्री लिने छ । मधेशमा उपेन्द्र यादव नेतृत्वको जसपा नेपाललाई सहमतिमा ल्याउन दुवै नेताले प्रयास गरेका छन् ।

यादवले मधेशमा मुख्यमन्त्री मागेमा दिन समेत दुई नेता सहमत भइसकेका छन् । यादवलाई सहमतिमा ल्याउने जिम्मेवारी प्रचण्डले पाएका छन् ।

एमाले र नेकपा मिले पनि बागमती र गण्डकीमा यी दुई दलको सरकार बन्न सम्भव छैन । राप्रपाको साथ पाए मात्र नयाँ सरकार बन्न सक्छ । गण्डकी र बागमतीमा राप्रपाको समर्थन जुटाउने जिम्मेवारी एमाले अध्यक्ष ओलीले लिएको स्रोतको दाबी छ ।

स्रोतका अनुसार, सकेसम्म आजै, नभए भोलि बिहान लिखित सहमति गर्ने र सातै प्रदेशमा नयाँ सरकार बनाउने अभियानमा लाग्ने नेताहरुको तयारी छ ।

आगामी स्थानीय तथा प्रदेश चुनावसम्म यो सहकार्यलाई कायम राख्ने र चुनावमा समेत सहकार्य गर्ने ओली र प्रचण्डको रणनीति छ । त्यसपछि पार्टी एकतासम्म पुग्न सकिने दुवै नेताहरुको तयारी रहेको छलफलमा सहभागी एक नेताले सिधाकुरालाई बताए ।

विष्णु पौडेल र शंकर पोखरेलको असहमति 

एमाले र नेकपाका बीचमा उसअघि पनि पटक(पटक छलफल भएको थियो । प्रचण्डसँग सहमतिको समझदारी जुटाउन ओलीले उपाध्यक्ष विष्णु पौडेल र महासचिव शंकर पोखरेललाई पनि आफ्नै गाडीमा राखेर लगेका थिए ।

तर, ओलीको प्रस्तावमा पौडेल र पोखरेल सहमत भएनन् । ओलीले प्रचण्डसँगको सहमतिमा उपाध्यक्ष र महासचिवलाई पनि साक्षी राख्न चाहे पनि उनीहरुले साथ नदिएपछि आज जारी छलफलमा उनीहरुलाई ‘डिफेम’ गरेको एक नेताले जानकारी दिए ।

‘विष्णु पौडेल र शंकर पोखरेल पार्टी नै फुटाउने तयारीमा छन्’ ओलीले प्रचण्डलाई भनेको कुरा उद्दृत गर्दै स्रोतले भन्यो, ‘त्यही भएर उनीहरुले हिजो सहमति जनाएनन् ।’

ओलीले विष्णु पौडेल र शंकर पोखरेलमाथि शंका गरिरहनुको कारण हो– एमालेमा पुनर्गठनको बहस तीव्र चलिरहेको छ ।

अहिले कार्यदलले प्रतिवेदन लेखिरहेको छ र निष्कर्ष मात्रै लेख्न बाँकी छ ।

निष्कर्ष खण्डमा ‘ओलीलाई के भनेर लेख्ने’ भन्नेमा कार्यदलका सदस्यहरुबीच छलफल चलिरहेको छ । ओलीको बहिर्गमनका लागि आधार निष्कर्षमा लेख्ने कार्यदलको तयारी छ ।

‘एमालेमा ओली संकटमा छन्, नेकपामा पनि प्रचण्ड सुरक्षित छैनन्, त्यसैले पार्टीभित्रै संकटमा परेका दुई नेताले आफू सुरक्षित हुने उपाय खोजिरहेका छन्’– एक नेताले भने ।