प्रचण्डसँग माधव नेपाल किन बने रूष्ट?

काठमाडौं । प्रदेश सरकार बाँडफाँटको तीन बुँदे सहमतिपछि नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ र सहसंयोजक माधवकुमार नेपालबीच चिसो बढेको छ ।

नेकपाका एक नेताले बताएअनुसार प्रचण्डले आफूसँग सल्लाह नै नगरी एमाले अध्यक्ष केपी शर्मा ओलीसँग मिलेर प्रदेश सरकारमा भागवण्डा गरेको भन्दै सहसंयोजक नेपाल रूष्ट बनेका हुन् ।

Watch On

शनिबार ओलीसँग सहमति गनुपूर्व प्रचण्डले नेता नेपालसँग सामान्य छलफल गरेका थिए । 

‘प्रदेश सरकार गठनका नयाँ ढंगले छलफल गरौं भन्ने केपी ओलीजीको प्रस्ताव छ भन्नुभएको रहेछ,’ ती नेताले सिधाकुरासँग भने, ‘माधव नेपालले प्रदेशहरूमा सर्वदलीय चुनावी सरकार बनाउनुपर्छ भन्नुभएको थियो । उहाँ कांग्रेससँग छलफलमा पनि हुनुहुन्थ्यो ।’

तर शनिबार नेता नेपालसँग सल्लाह नै नगरी प्रचण्डले सहमतिको कागज बोकेर फर्किएपछि उनको नियतमाथि प्रश्न उठेको पूर्व एकीकृत समाजवादीका ती नेताले बताए ।

‘अहिले दुवै पार्टीमा रूपान्तरण र पुनर्गठनको प्रश्न छ । प्रदेश सरकारको भागबण्डा जनताले रूचाएका पनि छैनन् । केही दिनअघि प्रचण्ड आफै हामीलाई प्रदेश सरकार चाहिएको छैन भन्दै हुनुहुन्थ्यो,’ ती नेताले भने ।

प्रचण्ड फर्किएपछि नेता नेपालले तीन बुँदे सहमतिबारे जिज्ञासा राखेका थिए । जबाफमा प्रचण्डले आफूले सम्पर्क गर्न खोज्दा फोन नै नलागेको बताएका थिए ।

‘उहाँ (ओली–प्रचण्ड) आफूमाथि आइपरेको संकट टार्ने उपायको खोजीमा हुनुहुन्थ्यो । प्रदेश सहकार्य त बाहना हो,’ ती नेताले भने ।

सहसंयोजक नेपाल सहमत नभएकाले शनिबारको हस्ताक्षरमा एकीकृत समाजवादीतर्फका कोही पनि नेता थिएनन् । प्रचण्डले वर्षमान पुन र महेन्द्रबहादुर शाहीलाई साक्षीका रूपमा उभ्याएका थिए । अध्यक्ष ओलीले उपाध्यक्ष पौडेललाई साक्षी राखेका थिए ।

यो सहमतिप्रति एमालेका नेताहरू पनि सन्तुष्ट छैनन् । 

उपमहासचिव योगेश भट्टराईले त छापामार शैलीमा सहमति गरिएको कटु टिप्पणी गरेका छन् । उनले सामाजिक सञ्जाल एक्सामार्फत एमाले र नेकपाबीचको तीन बुँदे सहमतिप्रति कटाक्ष गरेका हुन् ।

‘आ–आफ्ना पार्टीमा रडाको, छैन सहभागिता, छैन पारदर्शिता, नियत र प्रक्रियामा प्रश्नै प्रश्न, पटक/पटक उही गल्ती, जवाफदेहिता खै?,’ उनले कवितात्मक शैलीमा लेखेका छन् ।

सहमति हुँदा महासचिव शंकर पोखरेल पनि थिएनन् ।

सहमतिपछि एमालेभित्र मुख्यमन्त्रीको विषयलाई लिएर नयाँ विवाद सुरू भएको छ ।

ओलीले कोशीका मुख्यमन्त्री हिक्मत कार्कीलाई हटाउन चाहेका छन् । उनी ताप्लेजुङका तीलकुमार मेन्याङ्बोलाई मुख्यमन्त्री बनाउन चाहन्छन् ।

तर ओलीले कार्कीको विकल्प खोज्न सक्ने अवस्था छैन ।

महासचिव शंकर पोखरेलले कर्णालीका मुख्यमन्त्री यामलाल कँडेललाई निरन्तरता दिन चाहेका थिए । तर ओलीले उनको इच्छाविपरीत नेकपालाई दिने समझदारी गरेपछि दुई नेताबीच तिक्तता झन् झाँगिएको छ ।

ओलीले कोशीको मुख्यमन्त्री फेर्न चाहेपछि उपाध्यक्ष विष्णु पौडेलले लुम्बिनीको पनि मुख्यमन्त्री फेर्न चाहेका छन् । लुम्बिनीमा अहिले चेतनारायण आचार्य मुख्यमन्त्री छन् । महासचिव पोखरेलनिकट मानिएका उनी मुख्यमन्त्रीको पद जोगाउन पछिल्लो समय ओलीको पक्षमा खुलेका छन् ।

यता बागमतीको मुख्यमन्त्री कसलाई बनाउने भन्ने पनि विवाद छ । बागमती संदीय दल नेता जगन्नाथ थपलिया छन् । तर उनलाई हटाएर भक्तपुरका किरण थापालाई मुख्यमन्त्री बनाउन ओलीले भूमिका खेलिरहेको नेताहरू बताउँछन् ।