महाधिवेशनकाे महिना दिनपछि पदाधिकारी मनोनीत गर्दै रास्वपा

काठमाडौँ । चितवनमा ७-१२ असारसम्म प्रथम राष्ट्रिय महाधिवेशन सम्पन्न गरेको राष्ट्रिय स्वतन्त्र पार्टीले एक महिनापछि पदाधिकारी र केन्द्रीय सदस्य मनोनीत गर्दैछ ।  

पदाधिकारी र केन्द्रीय सदस्य मनोनीत गर्न सभापति रबि लामिछानेले बुधबार केन्द्रीय समितिको दोस्रो बैठक बोलाएका छन् । 

Watch On

केन्द्रीय कार्यालयमा विहान ११ बजे बस्ने बैठकमा सभापति लामिछानेले मनोनीत गर्ने पदाधिकारी र केन्द्रीय सदस्यहरुको नाम प्रस्ताव गर्नेछन् । 

चितवन महाधिवेशनबाट रास्वपाले सभापतिमा लामिछाने, उपसभापतिमा डा स्वर्णिम वाग्ले, सोविता गौतम, महामन्त्रीमा विपीन आचार्य, सहमहामन्त्रीमा हरि ढकाल, असिम शाह र निशा डाँगीलाई निर्वाचित गरेको छ । 

अब सभापतिले वरिष्ठ नेता, उपसभापति, महामन्त्री, सहमहामन्त्री दुई, कोषाध्यक्ष, सहकोषाध्यक्ष दुई, प्रवक्ता, सहप्रवक्ता तीन जना मनोनीत गर्न बाँकी छ । नेताहरुकाअनुसार सभापति लामिछाने कोषाध्यक्ष र प्रवक्ता मनोनीत गर्ने तयारीमा छन् । 

यसैगरी महाधिवेशनबाट ९९ जना केन्द्रीय सदस्य निर्वाचित भएका छन् । केन्द्रीय सभापति र प्रदेश सभापतिहरु पनि स्वत केन्द्रीय सदस्य चुनिएका छन् । १५८ सदस्यीय केन्द्रीय समितिमा अब सभापतिले ५१ जना केन्द्रीय सदस्य मनोनीत गर्न बाँकी छ । केन्द्रीय समितिको बुधबारको बैठकबाट केही केन्द्रीय सदस्य पनि मनोनीत गर्ने तयारी छ । 

महामन्त्री विपीन आचार्यले केही पदाधिकारी र केन्द्रीय सदस्य मनोनीत हुनसक्ने बताए । तर आफूलाई थप जानकारी नभएको उनको भनाइ छ । मनोनीत गर्दा समानुपातिक समावेशी सिद्धान्तलाई प्राथमिकता दिइने र समायोजन भएका पक्षलाई महत्त्व दिइने आचार्यले बताए । 

महामन्त्री आचार्यकाअनुसार केन्द्रीय समितिको दोस्रो बैठकमा प्रथम राष्ट्रिय महाधिवेशनको समग्र समीक्षा हुनेछ । यसैगरी आवश्यक कार्यविधिहरूको तर्जुमा तथा परिमार्जनका लागि छलफल हुनेछ । आगामी अभियान तथा कार्यक्रम सञ्चालन सम्बन्धमा पनि केन्द्रीय समितिले दिशानिर्देश गर्नेछ ।