रास्वपा केन्द्रीय समितिको दोस्रो बैठक बस्दै, यस्तो छ सभापति लामिछानेको तयारी

काठमाडौँ । राष्ट्रिय स्वतन्त्र पार्टीको केन्द्रीय समितिको दोस्रो बैठक आज बस्दैछ । चितवनमा ७-१२ असारसम्म प्रथम राष्ट्रिय महाधिवेशन सम्पन्न गरेको एक महिनापछि बस्न लागेको बैठकले महाधिवेशनको समीक्षा गर्दैछ । 

महामन्त्री विपीन आचार्यकाअनुसार केन्द्रीय कार्यालयमा विहान ११ बजे बस्ने केन्द्रीय समितिको दोस्रो बैठकमा प्रथम राष्ट्रिय महाधिवेशनको समग्र समीक्षा हुनेछ । यसैगरी आवश्यक कार्यविधिहरूको तर्जुमा तथा परिमार्जनका लागि छलफल हुनेछ । आगामी अभियान तथा कार्यक्रम सञ्चालन सम्बन्धमा पनि केन्द्रीय समितिले दिशानिर्देश गर्नेछ । 

Watch On

बैठकको एजेण्डामा साङ्गठनिक व्यवस्थापन तथा मनोनयन पनि राखिएको छ । तर, पदाधिकारी मनोनीत हुने सम्भावना न्यून छ । सभापति रबि लामिछाने तत्कालै पदाधिकारी मनोनीत गरिहाल्ने अवस्थामा नरहेको एक निर्वाचित पदाधिकारीले बताए । 'आजको बैठकमा पदाधिकारी मनोनीत हुने सम्भावना न्यून छ । सभापतिज्यू अहिले नै पदाधिकारी मनोनीत गरिहाल्ने अवस्थामा हुनुहुन्न,' ती पदाधिकारीले भने । 

यद्यपि केही केन्द्रीय सदस्य मनोनीत हुने उनले बताए । 'केही साथीहरु केन्द्रीय सदस्यमा मनोनीत हुनुहुन्छ । पदाधिकारीहरु भने केही समयपछि मनोनीत गर्ने कुरा छ,' ती पदाधिकारीले भने । 

उनकाअनुसार सभापति लामिछानेले मनोनीत गर्ने केही केन्द्रीय सदस्यहरुको नाम केन्द्रीय समितिमा प्रस्ताव गर्नेछन् । समितिले अनुमोदन गर्नेछ । 

चितवन महाधिवेशनबाट रास्वपाले सभापतिमा लामिछाने, उपसभापतिमा डा स्वर्णिम वाग्ले, सोविता गौतम, महामन्त्रीमा विपीन आचार्य, सहमहामन्त्रीमा हरि ढकाल, असिम शाह र निशा डाँगीलाई निर्वाचित गरेको छ । 

अब सभापतिले वरिष्ठ नेता, उपसभापति, महामन्त्री, सहमहामन्त्री दुई, कोषाध्यक्ष, सहकोषाध्यक्ष दुई, प्रवक्ता, सहप्रवक्ता तीन जना मनोनीत गर्न बाँकी छ । जुन अब केही समयपछि मात्रै हुने भएको छ । 

यसैगरी महाधिवेशनबाट ९९ जना केन्द्रीय सदस्य निर्वाचित भएका छन् । केन्द्रीय सभापति र प्रदेश सभापतिहरु पनि स्वत केन्द्रीय सदस्य चुनिएका छन् । १५८ सदस्यीय केन्द्रीय समितिमा अब सभापतिले ५१ जना केन्द्रीय सदस्य मनोनीत गर्न बाँकी छ । आजको बैठकबाट केही केन्द्रीय सदस्य पनि मनोनीत गर्ने सभापतिको तयारी छ । 

महामन्त्री विपीन आचार्यले साङ्गठनिक व्यवस्थापन तथा मनोनयन बैठकको एजेण्डा भएको तर कुन कुन पदमा नियुक्त हुन्छ भन्ने जानकारी नभएको बताए ।