हामी सबै देश बनाउन आएको हो, गुटबन्दी नगरौं : सभापति लामिछाने

काठमाडौँ । राष्ट्रिय स्वतन्त्र पार्टीका सभापति रवि लामिछानेले गुटबन्दी नगर्न केन्द्रीय सदस्यहरुलाई अपिल गरेका छन् । बुधबार करिब ५ घण्टा चलेको केन्द्रीय समिति बैठकमा केन्द्रीय सदस्यहरु समूहमा विभाजित भएर धारणा राखेपछि सभापति लामिछाने गुटबन्दी नगर्न आह्वान गरेका हुन् । 

सभापति लामिछानेले सबै जना देश बनाउने उद्देश्यले आएको भन्दै मिलेर जानुपर्नेमा जोड दिएका थिए । लामिछानेले महाधिवेशनमा पनि गुटबन्दीको प्रयास भएको र सतर्क हुनुपरेको बताए । वरिष्ठ नेता बालेन शाह पनि आफ्नै पक्ष भएको भन्दै रास्वपा एउटै परिवार र पक्ष भएकोमा उनले जोड दिए । 'हामी एउटै हो । सबै हामी देश बनाउन आएको हो । परिवर्तन गर्न आएको हो । मिलेर गर्नुपर्छ । सरकारलाई काम गर्न दिनुपर्छ । हामीले खबरदारी पनि गर्नुपर्छ । तर, गुटबन्दी नगरौं,' उनले भने । 

Watch On

सभापति लामिछानेले पदका लागि कोही सिंहदरबार, कोही बूढानीलकण्ठ त कोही बालुवाटार कुदेकोमा आफूलाई चित्त दुखेको पनि बताए । 'कोही कहाँ कुद्ने, कोही बालुवाटार धाउने, कति चित्त दुख्छ, त्यस्तो नगरौं,' उनले भने ।

सभापति लामिछानेले महाधिवेशनमा भएका कमजोरीका लागि आफूलाई दोषी करार गर्न आग्रह गर्दै आफ्नै साथीहरुलाई छानबिनभन्दा पनि आगामी दिनमा सुधारेर जाने बताए । 'मैले कसरी आफ्नैलाई छानबिन गर्नू । बरु मलाई नै दोषी करार गर्नुस् । जे भयो भयो अब सुधारेर जाउ,' उनले भने । 

सबैले पदको मात्रै कुरा गरेकामा आफूलाई दुख लागेको उनले बताए । 'बालेनलाई १० वर्ष लेखेर दिनुपर्छ भने दिन्छु । तर गुटबन्दी र पदलोलुपता सबै साथीले त्यागौं,' उनले भने । 

सभापति लामिछानेले सर्वदलीय बैठक प्रधानमन्त्री बालेन्द्र शाहसँग सल्लाह गरेर राखेको पनि जानकारी गराएका थिए ।