हिमपहिरोमा परेर निर्मल पुर्जासहित १० आरोही सम्पर्कविहीन

काठमाडौँ । विश्वप्रसिद्ध पर्वतारोही निर्मल पुर्जाको नेतृत्वमा रहेको १० सदस्यीय अन्तर्राष्ट्रिय पर्वतारोहण टोली पाकिस्तानको ब्रड पिकमा आएको हिमपहिरोपछि सम्पर्कविहीन भएका छन् । 

पाकिस्तानी पर्वतारोहण अधिकारीहरूका अनुसार बिहीबार दिउँसो करिब १२ बजेतिर काराकोरम हिमश्रृंखलामा अवस्थित ८,०४७ मिटर अग्लो ब्रड पिकमा हिमपहिरो गएको थियो । त्यसपछि टोलीसँग कुनै सम्पर्क हुन सकेको छैन । 

Watch On

बिबिसीका अनुसार उक्त टोलीमा एक अमेरिकी, एक चिनियाँ नागरिक, एक ओमानी र पाँच नेपाली पर्वतारोही छन् । उद्धार टोलीले हेलिकप्टरमार्फत खोजी कार्य सुरु गरेको छ । जसमा सिरबाज खानजस्ता अनुभवी पर्वतारोहीहरूले पाइलटहरूलाई मार्गदर्शन गरिरहेका छन् । 

ब्रड पिकलाई चुनौतीपूर्ण हिमालहरूमध्ये एक मानिन्छ र यो विश्वको १२औँ अग्लो शिखर हो।

पाकिस्तानको अल्पाइन क्लबले जारी गरेको वक्तव्यमा सरकारसँग निरन्तर सम्पर्कमा रहँदै तत्काल खोज तथा उद्धार अभियान सुरु गर्न पहल भइरहेको जनाएको छ ।

क्लबले हेलिकप्टर सहयोग सुनिश्चित गर्न र उपलब्ध सबै स्रोतहरू यथाशीघ्र परिचालन गर्न सम्भव सबै प्रयास भइरहेको उल्लेख गरेको छ।

“यस कठिन समयमा सबै पर्वतारोहीहरूको सुरक्षा र सफल उद्धारको कामना गर्दै उनीहरूका परिवार तथा अन्तर्राष्ट्रिय पर्वतारोहण समुदायसँग ऐक्यबद्धता जनाउँछौँ,” वक्तव्यमा भनिएको छ ।

टोलीका नेता पुर्जा सन् २०१९ मा मात्र छ महिनाभन्दा अलि बढी समयमै विश्वका ८,००० मिटरभन्दा अग्ला सबै १४ हिमाल आरोहण गरेर चर्चित बनेका थिए ।