कोशी एमालेमा विवादः हिक्मतको अडानपछि शेरधनले बोलाए भेला

विराटनगर । कोशी प्रदेशमा तीलकुमार मेन्याङ्बोलाई मुख्यमन्त्री बनाउने एमाले अध्यक्ष केपी शर्मा ओलीको योजनामा हिक्मतकुमार कार्की बाधक बनेपछि पार्टी सचिवसमेत कोशी प्रदेश इन्चार्ज शेरधन राईले विराटनगरमा प्रदेशसभा सदस्यहरुको भेला बोलाएका छन् ।

प्रदेश इन्चार्ज राईको आह्वानमा अहिले केहीबेरमा कोशी प्रदेशसभामा एमालेका सांसदहरूको भेला पार्टी कार्यालयमा सुरू हुँदैछ ।

Watch On

गत साता एमालेका शीर्ष नेताहरूका बीचमा कोशीको मुख्यमन्त्री हिक्मतकुमार कार्कीलाई नै निरन्तरता दिने सहमति भएको भए पनि अध्यक्ष ओलीले नै तिलकुमारलाई मुख्यमन्त्री बनाउने जिम्मेवारीसहित सचिव राईलाई विराटनगर पठाएका थिए ।

राईले हिजो नै कार्कीसँग अध्यक्ष ओलीको सन्देशसहित छलफल गरेका थिए । मुख्यमन्त्रीबाट राजीनामा दिएर मार्ग प्रशस्त गर्न कार्कीलाई राईले आग्रह गरेका थिए । राई र कार्की दुवै जना एमाले केन्द्रीय कमिटीका सचिव हुन् । 
कार्कीले ‘आफूले राजीनामा नदिने, राजीनामा दिए संवैधानिक संकट आउने र आफूलाई सामान्य बहुमतले समेत संसदीय दलको नेताबाट हटाउन नसकिने’ बताएपछि राईले नयाँ रणनीति तय गर्न प्रदेश सभा सदस्यहरुको भेला बोलाएका हुन् ।

आजको भेलामा विशेषगरी संसदीय दलको विधान संशोधनका विषयमा छलफल हुन सक्ने एक नेताले बताए ।

यसअघि मुख्यमन्त्रीका दाबेदार तीलकुमार मेन्याङ्बोले ‘कार्कीले विधानमा झेल’ गरेको बताएका थिए ।

कोशीमा एमालेका ४० सांसद छन् । सबैलाई बोलाइएको भने पनि कार्की पक्षका सांसदहरू सहभागी नहुन सक्ने बताइएको छ ।