मुख्य समाचार

मध्यपहाडी लोकमार्गमा बस र कार ठोक्किँदा कार सुनकोशीमा खस्यो, तीन जना बेपत्ता

सिधाकुरा

सोमबार, साउन १८, २०८३

मध्यपहाडी लोकमार्गमा बस र कार ठोक्किँदा कार सुनकोशीमा खस्यो, तीन जना बेपत्ता

सिन्धुली । सिन्धुलीको फिक्कल गाउँपालिका–२ नवलपुरस्थित मध्यपहाडी लोकमार्गमा सोमबार बस र कार एकापसमा ठोक्किँदा कार सुनकोशी नदीमा खस्दा तीन जना बेपत्ता भएका छन् ।

प्रहरीका अनुसार बिहान करिब ११ः४५ बजे काठमाडौंबाट ओखलढुंगातर्फ जाँदै गरेको बा.प्र.०८–००१ ख ०१४४ नम्बरको बसले विपरीत दिशाबाट खोटाङतर्फबाट खुर्कोट आउँदै गरेको सडक विभाग यान्त्रिक कार्यालय मुलकोटको नम्बर नखुलेको कारलाई ठक्कर दिएको थियो ।

Watch On

ठक्करपछि कार सडकबाट करिब ५० फिट तल सुनकोशी नदीमा खसेको प्रहरीले जनाएको छ ।

दुर्घटनामा कार चालक सिन्धुपाल्चोकका करिब ३९ वर्षीय दिलकुमार लामा, स्काभेटर चालक सिन्धुलीको गोलन्जोर गाउँपालिका–१ का करिब २७÷२८ वर्षीय गणेश थापा तथा नाम, थर र ठेगाना नखुलेका एक जना सहयोगी (हेल्पर) बेपत्ता भएका छन् । उनीहरूको खोजी तथा उद्धार कार्य जारी रहेको प्रहरीले जनाएको छ ।

बस चालक सिन्धुलीको फिक्कल गाउँपालिका–६ का २६ वर्षीय हेमबहादुर तामाङलाई प्रहरीले नियन्त्रणमा लिएको छ । बसलाई समेत नियन्त्रणमा लिएर प्रहरी चौकी खाङसाङमा राखिएको छ ।

प्रहरीका अनुसार बेपत्ता व्यक्तिहरू तथा नदीमा खसेको कारको खोजीका लागि उद्धार टोली परिचालन गरिएको छ । दुर्घटनाको थप अनुसन्धान भइरहेको प्रहरीले जनाएको छ ।

प्रकाशित मिति: सोमबार, साउन १८, २०८३

प्रतिक्रिया दिनुहोस्