कोशीका मुख्यमन्त्री कार्की र पार्टी अध्यक्ष खतिवडालाई काठमाडौँ आउन ओलीको निर्देशन

काठमाडौँ । नेकपा एमालेका अध्यक्ष केपी शर्मा ओलीले कोशी प्रदेशमा नयाँ मुख्यमन्त्री चयनमा पार्टीभित्रै विवाद बढिरहेका बेला मुख्यमन्त्री हिक्मत कार्की र एमाले कोशी प्रदेश अध्यक्ष घनश्याम खतिवडालाई भोलि (मंगलबार) सम्म काठमाडौँ आउन निर्देशन दिएका हुन् ।

कार्कीलाई हटाएर ताप्लेजुङका प्रदेश सांसद  तिलकुमार मेन्याङ्बोलाई कोशी प्रदेशको मुख्यमन्त्री बनाउन खोजेका अध्यक्ष ओलीले विराटनगरमा कुनै प्रगति नभएपछि कार्की र खतिवडालाई काठमाडौँ डाकेका हुन् । 
एमाले स्रोतका अनुसार, अध्यक्ष ओली दुवै जनालाई भोलि दिउँसोसम्म आउन भनेका हुन् ।

Watch On

ओली, कार्की र खतिवडाबीच भक्तपुरको गुण्डुस्थित ओली निवासमै छलफल गराउने तयारी छ ।

ओलीले आफ्नो प्रतिनिधिका रुपमा पार्टी सचिव एवम् पूर्वमुख्यमन्त्री शेरधन राईलाई विराटनगर पठाएका थिए । राईले कार्कीलाई राजीनामा दिएर मार्गप्रशस्त गर्न अध्यक्षका तर्फबाट आग्रह गरे पनि कार्कीले उक्त आग्रह अस्वीकार गरेपछि विवाद बढेको हो ।

गत साता एमालेका चार शीर्ष नेता अध्यक्ष ओली, उपाध्यक्ष रामबहादुर थापा र विष्णु पौडेल तथा महासचिव शंकर पोखरेलका बीचमा कोशीमा कार्कीलाई निरन्तरता दिने सहमति भएको थियो । तर, उक्त सहमतिविपरीत ओलीले मेन्याङ्बोलाई मुख्यमन्त्री बनाउन खोजेपछि सिंगो एमाले तरंगित छ ।

कार्कीले आफूले मुख्यमन्त्री छाड्नुपर्ने भए पार्टी सचिवालयले लिखित रुपमा निर्णय गर्नुपर्ने शर्त राखेका छन् ।

तर, ओलीले भने लिखित निर्देशन नदिई मौखिक निर्देशन मात्र दिइरहेका छन् ।

भोलिको छलफलमा महासचिव शंकर पोखरेल भने सहभागी हुने छैनन् । पोखरेल पूर्वनिर्धारित कार्यक्रम अनुसार दाङ जाने छन् ।

एमालेमा कोशी प्रदेशका मुख्यमन्त्री कार्की र प्रदेश अध्यक्ष खतिवडा दुवै जना अध्यक्ष ओली पक्षधर हुन् । तर, पछिल्लो समय ओली र कार्की टाढिँदै गएका छन् ।