हानेपा सरकारमा, बागमतीमा सत्ता समीकरण थप पेचिलो

काठमाडौं । हाम्रो नेपाली पार्टी (हानेपा) का शैलेन्द्रमान बज्राचार्य बागमती प्रदेश सरकारको भौतिक पूर्वाधार विकास मन्त्री नियुक्त भएका छन् । बागमती प्रदेश प्रमुख कार्यालयका सूचना अधिकारी अर्जुन आचार्यका अनुसार बज्राचार्य मन्त्री नियुक्त भएर शपथ ग्रहणको प्रक्रिया अघि बढेको छ ।
बागमतीमा एमाले–नेकपा गठबन्धनमार्फत नयाँ सरकार गठनको तयारी भइरहेका बेला मुख्यमन्त्री इन्द्रबहादुर बानियाँले हानेपालाई सरकारमा सहभागी गराएका हुन् ।

यसअघि भौतिक पूर्वाधार विकास मन्त्री रहेकी बिनु रायमाझी पौडेलले पदबाट राजीनामा दिएकी छन् । मुख्यमन्त्री बानियाँको निर्देशनमा उनको राजीनामा गराएर रिक्त भएको मन्त्रालय हानेपालाई दिइएको स्रोतको दाबी छ ।

Watch On

हानेपा कांग्रेस नेतृत्वको सरकारमा सहभागी भएपछि बागमतीको सत्ता समीकरण थप रोचक बनेको छ । एमाले र नेकपाले सरकार गठनका लागि राप्रपाको समर्थन नपाए हानेपासँग सहकार्य गर्ने विकल्प खुला राखेका थिए । तर हानेपा कांग्रेस नेतृत्वको सरकारमै सहभागी भएपछि त्यो सम्भावना तत्कालका लागि टरेको देखिएको छ ।

बागमती प्रदेशसभामा हानेपाका दुई सांसद छन् । १०४ सदस्यीय प्रदेशसभामा सरकार गठनका लागि ५३ सांसदको समर्थन आवश्यक पर्छ । एमाले र नेकपाबीच भएको सत्ता साझेदारी सहमतिअनुसार बागमतीमा एमालेको नेतृत्वमा सरकार गठन गर्ने तयारी भइरहेको छ । अहिलेको घटनाक्रमले भने सरकार गठनको अंकगणित र राजनीतिक रणनीतिमा नयाँ मोड थपिएको छ ।