किरणको पक्षमा ओली पक्षले कति पुर्‍यायो हस्ताक्षर ?

काठमाडौं । बागमती प्रदेशको मुख्यमन्त्रीलाई लिएर नेकपा एमालेभित्र विवाद चरमउत्कर्षमा पुगेको छ ।

प्रदेश संसदीय दल नेता जगन्नाथ थपलियाविरूद्ध पार्टी प्रदेश इन्चार्ज महेश बस्नेतले बहुमत हस्ताक्षर जुटाउन लागेका छन् । उनले प्रदेश सभा सदस्य किरण थापामगरको पक्षमा बहुमत जुटाइरहेका हुन् ।

Watch On

एक सांसदका अनुसार किरण थापामगरको पक्षमा १४ सांसदको हस्ताक्षर जुटेको छ । प्रदेश सभामा एमालेका २५ सांसद छन् । दल नेता फेर्न १३ सांसद आवश्यक पर्छ ।

आवश्यक संख्या पुगिसकेकाले अध्यक्ष ओलीले सोमबार राति दल नेता थपलियालाई बोलाएर हप्कीदप्की गरेको सांसदहरूले आरोप लगाएका छन् ।

‘अध्यक्ष ओली सुरूदेखि नै थपलिया हटाउने पक्षमा हुनुहुन्थ्यो । त्यसमा महेशले साथ दिइरहेका छन् । केही दिनअघि महेशकै अग्रसरतामा गराइएको हस्ताक्षरमा १४ जनाले हस्ताक्षर गरेका रहेछन्,’ ती सांसदले भने ।

उनका अनुसार केही सांसदले छलफलका लागि बोलाएर कागजमा सही गराएको भन्दै फिर्ता लिने बताएका थिए । अहिले उनीहरू पनि होल्ड छन् ।

११० सदस्यीय प्रदेश सभामा हाल १०४ कायम छन् । सरकार बनाउन ५३ जना सांसद आवश्यक पर्छ । प्रदेश सभाको दोस्रो ठूलो दल नेकपासँग २६ सांसद छन् । एमालेसँग २५ सांसद छन् ।

काठमाडौं ९(२) बाट निर्वाचित प्रदेश सभा सदस्य केशव पोखरेलका अनुसार सरकार गठनका लागि गठबन्धनको मत नपुग्ने भएपछि राष्ट्रिय प्रजातन्त्र पार्टीसँग छलफल भइरहेको छ । राप्रपासँग १२ सांसद छन् ।