मन्त्रालयले देशकेन्द्रित कूटनीतिक रणनीति बनाउँदै छ– परराष्ट्रमन्त्री खनाल

काठमाडौं । परराष्ट्रमन्त्री शिशिर खनालले परराष्ट्र मन्त्रालयले देशकेन्द्रित रणनीतिक कार्ययोजना निर्माणको काम अघि बढाइरहेको बताएका छन् ।

मंगलबार परराष्ट्र मन्त्रालयमा आयोजित मन्त्रालयस्तरीय विकास समस्या समाधान समिति (एमड्याक) बैठकलाई सम्बोधन गर्दै मन्त्री खनालले मन्त्रालयका विभिन्न महाशाखाले द्विपक्षीय सम्बन्धलाई थप प्रभावकारी बनाउने उद्देश्यसहित रणनीतिक कार्ययोजना तयार गरिरहेको जानकारी दिए ।

Watch On

उनका अनुसार रणनीतिले नेपालले सम्बन्धित मुलुकसँगको सम्बन्धबाट अधिकतम लाभ लिन सक्ने आधार तयार गर्नेछ । 'द्विपक्षीय रणनीतिलाई बलियो बनाउने गरी काम भइरहेको छ । उक्त रणनीतिमार्फत नेपालले सम्बन्धित मुलुकबाट कसरी अधिकतम लाभ लिन सक्छ भन्ने हिसाबले योजना बनाइनेछ,' उनले भने ।

मन्त्री खनालले प्रत्येक मुलुकसँगका प्राथमिकताका क्षेत्र पहिचान गरी त्यसैका आधारमा रणनीतिक योजना निर्माण भइरहेको बताए ।

विदेशमा रहेका नेपालीको यथार्थ तथ्यांक अभावले नीति तथा योजना निर्माण र कार्यान्वयनमा चुनौती सिर्जना भएको उल्लेख गर्दै उनले विदेशस्थित नेपालीको संख्या यकिन गर्न विशेष अभियान सञ्चालन गर्नुपर्ने आवश्यकता औंल्याए ।

बैठकमा राष्ट्रिय योजना आयोगका उपाध्यक्ष गुनाकर भट्ट, परराष्ट्र सचिव अमृतबहादुर राई तथा परराष्ट्र मन्त्रालय र विभिन्न मन्त्रालयका प्रतिनिधिहरूको सहभागिता रहेको थियो ।