ओली–हिक्मत एक्लाएक्लै छलफलमा के भयो कुराकानी?

काठमाडौं । नेकपा एमालेका अध्यक्ष केपी शर्मा ओली र कोशीका मुख्यमन्त्री हिक्मत कार्कीबीचको मंगलबार साँझको छलफल निष्कर्षमा नपुगेको नेताहरूले बताएका छन् ।

अध्यक्ष ओली र पार्टी केन्द्रीय सचिवसमेत रहेका कार्कीबीच मंगलबार छलफल भएको थियो ।

Watch On

ओलीनिवास गुण्डुमा भएको छलफलमा मुख्यमन्त्री कार्कीले ‘आफूले राजीनामा नदिने र पार्टीको संस्थागत निर्णय मान्ने’ बताएको एक पदाधिकारीले बताएका थिए । ती नेताकाअनुसार कार्कीले राजीनामा दिँदा संवैधानिक संकट आउनसक्ने बताएका थिए ।

मंगलबारको छलफल निष्कर्षमा नपुगेपछि बुधबार दिउँसो पुनः कुराकानी हुने ती पदाधिकारीको भनाइ छ ।

कोशी प्रदेशका सांसद रेवतीरमण भण्डारीले अध्यक्ष र मुख्यमन्त्री कार्कीबीचको छलफल सौहार्द भएको र आज निष्कर्षमा पुग्ने बताए ।

‘उहाँहरूबीचको कुराकानी बाहिर आएजस्तो, पहिले चर्चा भएजस्तो नराम्रो केही छैन । अध्यक्षज्यूको कुराकानी सकारात्मक छ । आज पनि छलफल गरेर निष्कर्षमा पुग्ने कुराकानी भएको मैलो पाएँ,’ भण्डारीले भने ।
मुख्यमन्त्री कार्कीको सचिवालयले पनि अध्यक्षले हिजो बिफ्रिङ मात्र लिएको र आज विस्तृतमा कुरा हुने जानकारी दियो ।

नेपाली कम्युनिस्ट पार्टी (नेकपा) बीच तीन बुँदे सहमति भएर प्रदेश सरकारमा फेरबदल हुन थालेसँगै एमालेभित्र विवाद सिर्जना भएको थियो । अध्यक्ष ओलीले कोशीको मुख्यमन्त्री फेर्न चाहेका छन् । उनले पदाधिकारीसँग एक चरण छलफल गरेर कोशी इन्चार्जसमेत रहेका शेरधन राईलाई विराटनगर पठाएका थिए । सचिव राईले विराटनगर पुगेर मुख्यमन्त्री कार्कीलाई राजीनामा दिन भनेका थिए ।

कार्कीले पार्टीको संस्थागत निर्णय मान्ने भन्दै अध्यक्ष ओलीको निर्देशन कार्यान्वयन गर्न नसकिने बताएका थिए । त्यहाँ विवाद नसल्टिने देखेपछि अध्यक्ष ओलीले नै प्रदेश इन्चार्ज शेरधन राई, अध्यक्ष घनश्याम खतिवडा, मुख्यमन्त्री हिक्मत कार्कीलाई छलफलका लागि बोलाएका थिए ।

ओलीले मंगलबार सामूहिक र एक्लाएक्लै पनि छलफल गरिसकेका छन् ।

आज निष्कर्ष आउने सम्भावना रहेको नेताहरूको भनाइ छ ।