ओली–लेखक पक्राउ प्रकरणमा प्रधानमन्त्री र गृहमन्त्रीले माफी मागून वा राजीनामा दिऊन्– शंकर पोखरेल

दाङ । नेकपा (एमाले)का महासचिव शंकर पोखरेल ले राज्यले कानुन कार्यान्वयनमा दोहोरो मापदण्ड अपनाउन नहुने बताएका छन् ।

प्रेस चौतारी दाङले आयोजना गरेको पत्रकार भेटघाट कार्यक्रममा बुधबार बोल्दै उनले विगतका घटनामा राजनीतिक जिम्मेवारीका आधारमा तत्कालीन प्रधानमन्त्री केपी शर्मा ओली र तत्कालीन गृहमन्त्री रमेश लेखकलाई पक्राउ गर्न मिल्ने हो भने वर्तमान घटनामा पनि सोही मापदण्ड लागू हुनुपर्ने बताएका हुन् ।

Watch On

पोखरेलले गत भदौ २३–२४ को घटनामा सुरक्षा निकायले गरेको बल प्रयोगको राजनीतिक जिम्मेवारी भन्दै तत्कालीन प्रधानमन्त्री ओली र गृहमन्त्री लेखकलाई पक्राउ गरिएको उल्लेख गर्दै पछिल्लो समय कोशी र मधेश प्रदेशका केही जिल्लामा प्रहरीमार्फत भएका हत्या तथा हिंसात्मक घटनाको नैतिक तथा राजनीतिक जिम्मेवारी वर्तमान प्रधानमन्त्री र गृहमन्त्रीले पनि लिनुपर्ने दाबी गरे ।

उनले एउटै प्रकृतिका घटनामा फरक–फरक मापदण्ड अपनाइनु विधिको शासनविपरीत हुने भन्दै कानुन सबैका लागि समान रूपमा लागू हुनुपर्नेमा जोड दिए ।

सरकारसँग अहिले दुई विकल्प मात्रै रहेको उनको भनाइ थियो । "यदि विगतमा अपनाइएको कदम गलत थियो भने त्यसबारे सार्वजनिक रूपमा माफी माग्नुपर्छ । अन्यथा वर्तमान घटनाको जिम्मेवारी स्वीकार गर्दै प्रधानमन्त्री र गृहमन्त्रीले राजीनामा दिएर कानुनी प्रक्रिया सामना गर्न मार्ग प्रशस्त गर्नुपर्छ," उनले भने ।

पोखरेलले राजनीतिक आग्रहका आधारमा कानुनको प्रयोग गरिए लोकतान्त्रिक प्रणाली र न्यायप्रणालीप्रतिको जनविश्वास कमजोर हुने चेतावनी दिँदै शासन सञ्चालनमा निष्पक्षता, जवाफदेहिता र समान मापदण्ड अनिवार्य हुनुपर्ने धारणा व्यक्त गरे ।