गुण्डुमा ढलेका जेएन सम्झिँदै कर्ण थापाले भने– अत्याचारीहरूले अकल्पनीय दण्ड भोग्नुपर्नेछ

काठमाडौँ । नेकपा (एमाले)का नेता कर्ण थापाले बागमती प्रदेश संसदीय दलका नेता जगन्नाथ (जेएन) थपलिया गुण्डुमा अचेत भएर ढलेको घटनालाई केवल एक व्यक्तिको स्वास्थ्य समस्या नभई पार्टीभित्रको राजनीतिक आस्था र विश्वासमाथिको प्रहार भएको टिप्पणी गरेका छन्।

सामाजिक सञ्जालमार्फत धारणा सार्वजनिक गर्दै थापाले पार्टी अध्यक्ष केपी शर्मा ओली कमजोर अवस्थामा रहेका बेला जेएन थपलिया उहाँका सबैभन्दा विश्वासिला र दृढ समर्थकमध्ये एक रहेको स्मरण गरेका छन्। पाँचौँदेखि एघारौँ महाधिवेशनसम्म थपलियाले ओलीको पक्ष कहिल्यै नछाडेको र गाउँ–बस्ती, विद्यालय, विश्वविद्यालय तथा किसानमाझ पनि उहाँकै पक्षमा खुलेर बहस गरेको थापाको भनाइ छ।

Watch On

आठौँ राष्ट्रिय महाधिवेशनअघि धेरै नेताहरू ओलीको पक्षमा उभिन हिच्किचाइरहेका बेला थपलिया बागमतीबाट खुलेर समर्थन गर्ने प्रमुख नेतामध्ये एक रहेको उल्लेख गर्दै थापाले आठौँदेखि नवौँ महाधिवेशनसम्मको अन्तरसंघर्षमा पनि उनले आफ्नो आस्था नत्यागेको बताएका छन्।

थापाले पछिल्ला वर्षहरूमा पार्टीभित्र लोकतान्त्रिक अभ्यास कमजोर बनेको, मूल्यांकन प्रणाली समाप्त पारिएको र मनपरी प्रवृत्ति हाबी भएको महसुसका कारण थपलिया मानसिक रूपमा पीडित बनेको दाबी गरेका छन्। गुण्डुमा ढलेपछि केही पदाधिकारी र पदका आकांक्षीहरूले उनको उपहास र अपमान गरेको आरोप पनि उनले लगाएका छन्।

'गुण्डुमा जेएनको शरीर मात्र ढलेको होइन, त्यहाँ एउटा राजनीतिक आस्था र विश्वास ढालिएको हो। एउटा संघर्षको इतिहासमाथि प्रहार गरिएको हो,' थापाले लेखेका छन्।

उनले थपलियामाथि भएको व्यवहारलाई त्याग, निष्ठा र बलिदानको अपमानको संज्ञा दिँदै यो घटना पार्टीभित्रको अत्याचारको पराकाष्ठाका रूपमा इतिहासमा लेखिने दाबी गरेका छन्।

सत्तामा रहेका नेतृत्वलाई लक्षित गर्दै थापाले चेतावनीपूर्ण शैलीमा भनेका छन्, 'जब आस्था र विश्वास घृणामा बदलिन्छ र त्यो घृणा विद्रोहमा रूपान्तरण हुन्छ, त्यसबेला अत्याचारीहरूले अकल्पनीय दण्ड भोग्नुपर्ने अवस्था आउँछ। त्यो दिन धेरै टाढा छैन।'