लन्डनमा हुनेछ निर्मल पुर्जाको अन्तिम बिदाइ

काठमाडौं । पाकिस्तानको ब्रड पिकमा आएको हिमपहिरोमा ज्यान गुमाएका विश्वप्रसिद्ध नेपाली पर्वतारोही निर्मल पुर्जा ‘निम्स दाइ’को अन्तिम बिदाइ बेलायतको लन्डनमा हुने भएको छ ।

परिवार लन्डनमा बस्दै आएकाले धार्मिक परम्पराअनुसार उतै अन्त्येष्टि गर्ने तयारी गरिएको हो । अन्त्येष्टिपछि उनको जन्मथलो म्याग्दीको अन्नपूर्ण गाउँपालिका–३ दाना र बाल्यकाल बिताएको चितवनमा पनि स्मृति कार्यक्रम आयोजना गरिने परिवारले जनाएको छ ।

Watch On

पुर्जाका दाजु कमलबहादुर पुर्जाका अनुसार अन्त्येष्टिको मिति भने आवश्यक कानुनी प्रक्रिया पूरा भएपछि मात्रै तय हुनेछ ।

‘भाइको निधनले संसारभरका शुभेच्छुकलाई स्तब्ध बनाएको छ । श्रीमती र छोरीलाई सहज हुने गरी सबै प्रक्रिया पूरा गरेर अन्त्येष्टि गरिनेछ,’ उनले भने ।

साउन १४ गते ब्रड पिक आरोहणका क्रममा गएको भीषण हिमपहिरोमा परी १० सदस्यीय आरोही टोलीका नेता रहेका पुर्जाको निधन भएको थियो । साउन १७ गते शव पहिचान भए पनि प्रतिकूल मौसम र शव रहेको स्थान अत्यन्त जोखिमपूर्ण भएकाले उद्धारमा ढिलाइ भएको थियो । बुधबार मात्रै कठिन अभियानपछि उहाँको शव बेसक्याम्पमा ल्याइएको हो ।

पुर्जाले स्थापना गरेको एलिट एक्सपिडिसनले पनि बुधबार विज्ञप्ति जारी गर्दै निर्मल पुर्जा, निमा शेर्पा, झोङ वाङ र किलु शेर्पाको शव सफलतापूर्वक बेसक्याम्पमा ल्याइएको जनाएको छ । कम्पनीका अनुसार आवश्यक प्रक्रिया पूरा गरी शव शुक्रबार राति वा शनिबारसम्म बेलायत पठाउने तयारी छ । लन्डन पुगेपछि पनि स्थानीय कानुनी प्रक्रिया पूरा गर्न केही समय लाग्नेछ ।

शव उद्धार अभियानमा पाकिस्तान सरकार, पाकिस्तान आर्मी, गिल्गिट–बाल्टिस्तान सरकार, पाकिस्तानस्थित नेपाली दूतावास, बेलायती उच्चायोग र अल्पाइन क्लब अफ पाकिस्तानको सहयोग रहेको कम्पनीले जनाएको छ ।

म्याग्दीमा जन्मिएका पुर्जा सन् २००३ मा पोखरास्थित ब्रिटिस क्याम्पमार्फत बेलायती सेनामा भर्ना भएका थिए । क्विन्स गोर्खा इन्जिनियर्समा सेवा गरेका उनी पछि बेलायतको रक्षा मन्त्रालयमा पर्वतीय विशेषज्ञका रूपमा कार्यरत रहे । सन् २०१७ मा १३ जना ब्रिटिस गोर्खाको सगरमाथा आरोहण अभियानको नेतृत्व पनि उनले गरेका थिए ।