सहमतिमै बाटो अलग भयो दुर्गा सोब र सन्तोष परियार समूहको

काठमाडौं । प्रगतिशील लोकतान्त्रिक पार्टीका दुई समूह आपसी सहमतिमै अलग हुने निर्णयमा पुगेका छन्। पार्टीका अध्यक्ष परिषद् सदस्यद्वय दुर्गा सोब र सन्तोष परियारले बुधबार सहमति पत्रमा हस्ताक्षर गर्दै एकीकृत पार्टीलाई विभाजन नगरी सहमतिमै छुट्टाछुट्टै राजनीतिक यात्रा अघि बढाउने निर्णय गरेका हुन्।

सहमति पत्रअनुसार दुर्गा सोब नेतृत्वको समूहले हालको प्रगतिशील लोकतान्त्रिक पार्टीको नाम परिवर्तन गरी निर्वाचन आयोगमा दर्ता रहेको पुरानो नाम, संरचना र ‘आँखा’ चुनाव चिह्नसहित पार्टी सञ्चालनका लागि आवश्यक कानुनी प्रक्रिया अघि बढाउनेछ।

Watch On

त्यस्तै, सन्तोष परियार नेतृत्वको समूहले ‘प्रगतिशील लोकतान्त्रिक पार्टी’ नाम र ‘आँखा’ बाहेकका तीन रङको झण्डा प्रयोग गर्दै नयाँ कानुनी प्रक्रियामार्फत पार्टी सञ्चालन गर्ने सहमति भएको छ।

दुवै पक्षले सहमति पत्रमा हस्ताक्षर गरेकै मितिदेखि आ–आफ्नो दलको नाम, कार्यालय, विधान, संगठनात्मक संरचना, चुनाव चिह्न र झण्डा प्रयोग गरी स्वतन्त्र रूपमा राजनीतिक गतिविधि सञ्चालन गर्ने उल्लेख गरिएको छ। साथै, एकीकृत पार्टीका चल–अचल सम्पत्ति, आर्थिक स्रोत, बैंक मौज्दात, ऋण तथा जिन्सीलगायत सम्पत्तिको पारदर्शी र न्यायोचित ढंगले बाँडफाँट गर्ने सहमति पनि भएको छ।

सहमति पत्रमा यो निर्णयलाई विभाजन वा आपसी विरोधका रूपमा नभई बदलिएको राजनीतिक परिस्थिति, वैचारिक तथा संगठनात्मक आवश्यकताअनुसार गरिएको स्वाभाविक राजनीतिक प्रक्रिया भएको उल्लेख छ। भविष्यमा सुशासन, समृद्धि, संविधानको संरक्षण, राष्ट्रिय स्वाधीनता र लोकतान्त्रिक मूल्य–मान्यताका विषयमा आवश्यकताअनुसार संवाद, सहकार्य र एकता कायम राख्ने प्रतिबद्धता पनि दुवै पक्षले जनाएका छन्।

दुवै समूहले सहमतिलाई कानुनी रूप दिन निर्वाचन आयोगमा जानकारी गराउँदै राजनीतिक दल सम्बन्धी ऐन, २०७३ को दफा १५ बमोजिम आवश्यक प्रक्रिया अघि बढाउने सहमति गरेका छन्। सहमति पत्रमा दुर्गा सोब र सन्तोष परियारसहित दुवै पक्षका नेताहरूले हस्ताक्षर गरेका छन्।