कार्यव्यवस्था परामर्श समितिका सांसदहरुले खोजे बैठक भत्ता

काठमाडौँ । कार्यव्यवस्था परामर्श समितिका सदस्यहरुले बैठक भत्ता खोजेका छन् । 

प्रतिनिधि सभाका अन्य विषयगत समितिमा सदस्यहरुलाई सुविधा रहेको तर  कार्यव्यवस्था समितिका सदस्यहरुलाई कुनै सुविधा नभएको विषय बुधबारको बैठकमा उठेको थियो । रास्वपाका मुख्य सचेतक कविन्द्र बुर्लाकोटीले भने, 'मलाइ साथीहरुले सोधिरहनुहुन्थयो । अन्य समितिमा सुविधा छ । तर, कार्यव्यवस्था समितिमा छैन, यसका सुविधा के हुन्छ ?'  

Watch On

जवाफमा संसद सचिवालयका प्रवक्ता एकराम गिरीले कार्यव्यवस्था समितिको हकमा पहिलेदेखि नै सुविधाको व्यवस्था नियमावलीमा नभएको जवाफ दिएका थिए । 

अन्य समितिको बैठक बस्दा सांसदले दुई हजार भत्ता पाउँछन् । कार्यव्यवस्था परामर्श समितिका सदस्यले भने पाउँदैनन् । यही सन्दर्भमा रास्वपाका मुख्य सचेतकले जिज्ञासा राखेका हुन् । 

प्रतिनिधि सभा बैठकमा पेश हुने विषयको प्राथमिकता तथा समयावधिको निर्धारण लगायत बैठकलाई सुव्यवस्थित ढङ्गले सञ्चालन गर्ने सम्बन्धमा र सभामुखले आवश्यक ठहर्‍याएको अन्य विषयमा परामर्श दिन प्रतिनिधि सभा नियमावली, २०८३ को नियम १३ बमोजिम सभामुखको अध्यक्षतामा १५ सदस्यीय कार्यव्यवस्था परामर्श समिति गठन हुने गरेको छ । सभामुखको नेतृत्वमा गठित समितिमा उपसभामुख र कानुन मन्त्री पदेन सदस्य रहने व्यवस्था छ । 

अहिले समितिमा रास्वपाबाट कविन्द्र बुर्लाकोटी, विपिन कुमार आचार्य, निशा डाँगी, प्रकाश चन्द्र परियार, क्रान्तिशिखा धिताल, अचुत्तम लामिछाने, देवराज पाठक, राजन गौतम, राम लामा सदस्य छन् । कांग्रेसबाट बासना थापा र निश्कल राई, एमालेबाट ऐनबहादुर महर, नेकपाबाट युवराज दुलाल, श्रम सँस्कृतिबाट आरेन राई, राप्रपाबाट खुश्बु ओली सदस्य छन् ।