मुख्य समाचार

ग्वार्को फ्लाइओभरमा बस ठोक्किँदा एक जनाको मृत्यु, १० जना घाइते

सिधाकुरा

बिहीबार, साउन २१, २०८३

ग्वार्को फ्लाइओभरमा बस ठोक्किँदा एक जनाको मृत्यु, १० जना घाइते

तस्बिर– सामाजिक सञ्जाल

काठमाडौं । ललितपुरको ग्वार्कोस्थित फ्लाइओभरमा बस दुर्घटना हुँदा एक जनाको मृत्यु भएको छ भने १० जना घाइते भएका छन् ।

बिहीबार बिहान करिब १०:३० बजे कोटेश्वरबाट सातदोबाटोतर्फ जाँदै गरेको बा २ ख ३५९० नम्बरको बस फ्लाइओभरको पर्खालमा ठोक्किएर दुर्घटना भएको हो ।

Watch On

जिल्ला प्रहरी परिसर ललितपुरका एसपी गौतम मिश्रका अनुसार दुर्घटनामा परी करिब ४० वर्षीया एक महिला यात्रुको मृत्यु भएको छ । उनको पहिचान खुल्न बाँकी छ ।

दुर्घटनामा घाइते भएका १० जनाको ग्वार्कोस्थित बी एन्ड बी अस्पतालमा उपचार भइरहेको प्रहरीले जनाएको छ । घाइतेमध्ये दुई जना पुरुष र बाँकी महिला रहेका छन् ।

घटनालगत्तै प्रहरी वृत्त सातदोबाटोको टोली घटनास्थल पुगेर उद्धार कार्य गरेको थियो ।

काठमाडौं उपत्यका ट्राफिक प्रहरी कार्यालयका एसपी नरेशराज सुवेदीका अनुसार प्रारम्भिक अनुसन्धानमा बस तीव्र गतिका कारण अनियन्त्रित भई फ्लाइओभरको पर्खालमा ठोक्किएको देखिएको छ ।

'तीव्र गतिमा गाडी चलाउँदा भित्तामा ठोक्किन पुगेको प्रारम्भिक देखिन्छ,' उनले भने ।

प्रहरीले बस चालकलाई नियन्त्रणमा लिएर दुर्घटनाबारे थप अनुसन्धान गरिरहेको जनाएको छ ।

प्रकाशित मिति: बिहीबार, साउन २१, २०८३

प्रतिक्रिया दिनुहोस्