ग्वार्को बस दुर्घटनामा ज्यान गुमाएकी महिलाको पहिचान खुल्यो, १८ घाइते

काठमाडौं । ललितपुरको ग्वार्कोस्थित फ्लाइओभरमा बिहीबार भएको बस दुर्घटनामा मृत्यु भएकी महिलाको पहिचान खुलेको छ । दुर्घटनामा दोलखाकी ४० वर्षीया जेनिशा लामाको मृत्यु भएको प्रहरीले जनाएको छ ।

बिहीबार बिहान करिब १०:१५ बजे कोटेश्वरबाट सातदोबाटोतर्फ जाँदै गरेको बा २ ख ३५९० नम्बरको मध्यपुर यातायातको बस ललितपुर महानगरपालिका–१७ ग्वार्को चोकस्थित फ्लाइओभरको भित्तामा ठोक्किएर पल्टिएको थियो ।

Watch On

दुर्घटनामा १८ जना घाइते भएका छन् । घाइतेमध्ये नौ जनाको ग्वार्कोस्थित बी एन्ड बी अस्पताल र नौ जनाको ग्लोबल अस्पतालमा उपचार भइरहेको छ ।

प्रहरीका अनुसार बस चालक काभ्रेको तिमाल घर भई भक्तपुर मालपोत बस्ने ३६ वर्षीय लक्षी तामाङलाई नियन्त्रणमा लिएर दुर्घटनाबारे अनुसन्धान भइरहेको छ ।

बी एन्ड बी अस्पतालमा उपचाररत घाइतेहरू:

• रामेछापकी २३ वर्षीया सुन्निमा योन्जन (गम्भीर)
• कञ्चनपुरका २४ वर्षीय तुल्सी धानुक
• भक्तपुरकी ४० वर्षीया कविता कार्की
• सिन्धुलीका ३३ वर्षीय धनकुमार ढोङ
• भक्तपुरकी ३७ वर्षीया लक्ष्मी श्रेष्ठ
• भक्तपुरकी २४ वर्षीया रशिला दुलाल
• भक्तपुरका ६० वर्षीय कृष्णराम थापा (सहचालक)
• काभ्रेकी ४१ वर्षीया अमृता कार्की
• ललितपुरकी ४० वर्षीया बिता केसी

ग्लोबल अस्पतालमा उपचाररत घाइतेहरू:

• दोलखाका २४ वर्षीय विवेक दाहाल
• सिन्धुलीकी १९ वर्षीया भगवती खत्री
• भक्तपुरकी ४७ वर्षीया भगवती खत्री
• भक्तपुरकी २८ वर्षीया जुनु सिल्पकार
• ललितपुरकी ४९ वर्षीया तुल्सीदेवी खड्का
• महोत्तरीकी २१ वर्षीया अन्जु साह
• काठमाडौंका २७ वर्षीय आशुतोष श्रेष्ठ
• सिन्धुपाल्चोकका ३६ वर्षीय स्तवर देउजा
• भारतका ४५ वर्षीय मोहम्द समिम

प्रारम्भिक अनुसन्धानअनुसार बस अनियन्त्रित भई फ्लाइओभरको भित्तामा ठोक्किएपछि पल्टिएको थियो । दुर्घटनाको कारणबारे थप अनुसन्धान भइरहेको प्रहरीले जनाएको छ ।