ग्यास अभाव तत्काल अन्त्य गर्न आयल निगमका नयाँ कार्यकारी निर्देशकलाई उद्योगमन्त्रीको निर्देशन

काठमाडौं  । उद्योग, वाणिज्य तथा आपूर्ति मन्त्री गौरीकुमारी यादवले नेपाल आयल निगमका नवनियुक्त कार्यकारी निर्देशक नागेन्द्रसाहलाई देशभर देखिएको एलपी ग्यासको अभाव तत्काल अन्त्य हुने गरी प्रभावकारी रूपमा काम गर्न निर्देशन दिएकी छन् ।

बिहीबार सपथ ग्रहण र पदबहाली गरेलगत्तै मन्त्रालयमा भएको भेटवार्तामा मन्त्री यादवले उपभोक्ताले ग्यास अभावका कारण कुनै पनि सास्ती भोग्न नपर्ने वातावरण बनाउन आवश्यक सबै कदम चाल्न निर्देशन दिइन् । उनले ग्यास आपूर्ति व्यवस्थालाई नियमित, सहज र प्रभावकारी बनाउन निगमले उच्च प्राथमिकताका साथ काम गर्नुपर्ने बताइन् ।

Watch On

मन्त्री यादवले दैलेखमा रहेको प्राकृतिक ग्यासको स्रोतको शीघ्र उत्खनन गरी व्यावसायिक उत्पादन र बजारीकरणको प्रक्रिया अघि बढाउन पनि निर्देशन दिइन् । स्वदेशी ऊर्जा स्रोतको अधिकतम उपयोगमार्फत ऊर्जा क्षेत्रमा आत्मनिर्भरता बढाउने सरकारको लक्ष्य पूरा गर्न दैलेखको प्राकृतिक ग्यास परियोजनालाई तीव्र गतिमा अघि बढाउनुपर्ने उनको भनाइ थियो ।

त्यसैगरी, उनले निगमभित्र सुशासन सुदृढ गर्न, संस्थागत पारदर्शिता र उत्तरदायित्व बढाउन तथा जनविश्वास अभिवृद्धि हुने गरी परिणाममुखी कार्यसम्पादन गर्न पनि नवनियुक्त कार्यकारी निर्देशकसाहलाई आग्रह गरिन् ।

मन्त्री यादवले उपभोक्तामैत्री सेवा, सुशासन र स्वदेशी ऊर्जा स्रोतको अधिकतम उपयोग सरकारको प्राथमिकतामा रहेको उल्लेख गर्दै त्यसअनुसार परिणाम देखिने गरी काम गर्न नेपाल आयल निगमलाई निर्देशन दिइन् ।

पदभार ग्रहणपछि कार्यकारी निर्देशकसाहले मन्त्रालयबाट प्राप्त निर्देशनलाई प्राथमिकताका साथ कार्यान्वयन गर्ने प्रतिबद्धता व्यक्त गरेका छन् । उनले ग्यास आपूर्ति व्यवस्थापनलाई सहज बनाउने, निगमभित्र सुशासन सुदृढ गर्ने र उपभोक्ताको विश्वास कायम राख्ने गरी काम गर्ने बताएका छन् ।