नयाँ शक्तिको बहस राजनीतिको केन्द्रमा पुग्नु ऐतिहासिक उपलब्धि– डा बाबुराम भट्टराई

काठमाडौं ।  नेपाल समाजवादी पार्टी (नयाँ शक्ति) का अध्यक्ष डा बाबुराम भट्टराईले समकालीन नेपालमा नयाँ वैकल्पिक राजनीतिको बहस आज नेपाली राजनीतिको केन्द्रमा स्थापित हुनु ऐतिहासिक उपलब्धि भएको बताएका छन् ।
 
सामाजिक सञ्जालमार्फत आफ्नो धारणा सार्वजनिक गर्दै भट्टराईले २०७० फागुन २५ गते प्रकाशित नेपाल साप्ताहिक मा ‘नयाँ शक्तिको खाँचो’ शीर्षकमा आफ्नो विश्लेषणात्मक लेख प्रकाशित भएपछि वैकल्पिक राजनीतिको राष्ट्रिय बहस सुरु भएको दाबी गरेका छन् ।

उनले पार्टी वा नेतृत्वको नामभन्दा पनि युग परिवर्तनसँगै देखा परेका समाज र राज्यका आधारभूत समस्याको पहिचान तथा समाधान गर्ने वैचारिक–राजनीतिक कार्यदिशा नै व्यवहारिक राजनीतिको मूल आधार हुने उल्लेख गरेका छन् ।

Watch On

भट्टराईले सार्वभौमिकता/स्वाधीनता, संघीयता/समावेशिता, सुशासन/सदाचार, समतामूलक समृद्धि र समुन्नत समाजवादलाई समकालीन नेपालको साझा पाँच आधारभूत राजनीतिक एजेन्डा (५ ‘स’) का रूपमा व्याख्या गरेका छन्।

यी एजेन्डामध्ये कुनै एक वा केहीलाई मात्रै अघि सारेर क्षणिक चुनावी लाभ लिन सकिने भए पनि त्यसलाई दाहिने वा देब्रे पपुलिज्मको संज्ञा दिँदै उनले सबै एजेन्डालाई प्राथमिकताबद्ध रूपमा कार्यान्वयन गरेर समाज र राज्यको दिगो रूपान्तरण गर्नु नै वैकल्पिक राजनीतिको वास्तविक उद्देश्य भएको बताएका छन् ।

भट्टराईले नयाँ तथा वैकल्पिक राजनीतिक शक्तिहरूबीच स्वस्थ बहस, प्रतिस्पर्धा र आवश्यक सहकार्य हुन सके समृद्ध नेपाल निर्माण सम्भव हुने विश्वास पनि व्यक्त गरेका छन् ।