ट्रम्पले रोके अमेरिका पुगेर सुत्केरी हुने ‘बर्थ टुरिजम’

काठमाडौं । अमेरिकी राष्ट्रपति डोनाल्ड ट्रम्पले जन्मसिद्ध नागरिकताको दायरा सीमित गर्ने उद्देश्यसहित दुई नयाँ कार्यकारी आदेशमा हस्ताक्षर गरेका छन् । केही साताअघि अमेरिकी सर्वोच्च अदालतले यस्तै प्रकृतिको अघिल्लो आदेश कार्यान्वयन गर्न रोक लगाएपछि ट्रम्पले संशोधित व्यवस्था अघि सारेका हुन् ।

नयाँ आदेशमध्ये एउटाले केही सीमित अवस्थाका अमेरिकामा जन्मिएका शिशुलाई स्वतः अमेरिकी नागरिकता नदिने व्यवस्था गरेको छ भने अर्को आदेशले बच्चालाई अमेरिकी नागरिकता दिलाउने उद्देश्यले अमेरिका पुगेर सुत्केरी हुने ‘बर्थ टुरिजम’ अभ्यासलाई रोक्ने लक्ष्य राखेको छ ।

Watch On

आदेशअनुसार अमेरिकी नागरिक नभएका अभिभावकमध्ये कुनै विदेशी सरकारका कर्मचारी, विदेशी आतंकवादी समूहसँग आबद्ध, जालसाजीमार्फत नागरिकता लिन खोजेका व्यक्ति वा संघीय कानुनअनुसार स्वतः नागरिकता नदिइने वर्गमा परेमा त्यस्ता व्यक्तिका अमेरिकामा जन्मिएका सन्तानले स्वतः नागरिकता नपाउने व्यवस्था प्रस्ताव गरिएको छ ।

ओभल अफिसमा आदेशमा हस्ताक्षर गर्दै ट्रम्पले सर्वोच्च अदालतको अघिल्लो फैसलालाई ‘दुर्भाग्यपूर्ण’ र ‘लज्जास्पद’ भन्दै जन्मसिद्ध नागरिकताको व्यवस्थाको दुरुपयोग भइरहेको दाबी गरे । उनले बर्थ टुरिजममार्फत मानिसहरूले अमेरिकी नागरिकता ‘किनिरहेको’ आरोप लगाउँदै अब यस्तो हुन नदिने बताए ।

ह्वाइट हाउसका उपप्रमुख नीति सल्लाहकार स्टिफन मिलरले बर्थ टुरिजम आजदेखि प्रतिबन्धित भएको दाबी गर्दै आप्रवासन तथा राष्ट्रियता ऐनले राष्ट्रपतिलाई यस्तो अधिकार दिएको बताए । प्रशासनले बच्चा जन्माउने उद्देश्यले मात्र अमेरिका आउन खोज्ने व्यक्तिलाई भिसा नदिने विकल्पसमेत अध्ययन गरिरहेको जनाएको छ ।

तर कानुनविद्हरूले नयाँ आदेश पनि कानुनी चुनौतीमा पर्ने लगभग निश्चित रहेको बताएका छन् । अमेरिकी नागरिक स्वतन्त्रता संघ (ब्ऋीग्) ले अमेरिकी संविधानको १४औँ संशोधनले जन्मसिद्ध नागरिकतालाई स्पष्ट रूपमा सुनिश्चित गरेकाले कार्यकारी आदेशमार्फत त्यसको अर्थ परिवर्तन गर्न नसकिने जनाएको छ ।

गत जुन ३० मा अमेरिकी सर्वोच्च अदालतले ट्रम्पको अघिल्लो आदेश ६–३ को बहुमतले खारेज गर्दै अमेरिकामा जन्मिएका व्यक्तिको नागरिकता संवैधानिक अधिकार भएको स्पष्ट गरेको थियो । त्यसपछि पुनर्विचारको निवेदन नदिएका ट्रम्पले पुनः नयाँ कार्यकारी आदेशमार्फत जन्मसिद्ध नागरिकताको दायरा सीमित गर्ने प्रयास गरेका हुन् ।
अन्तर्राष्ट्रिय समाचार संस्थाहरूको सहयोगमा ।