सदनमा उठ्यो सुनकोशीमा वृद्ध दम्पती बेपत्ता भएको घटना

काठमाडौं । मण्डनदेउपुर नगरपालिका–७का वृद्ध केदारनाथ पराजुली र उनकी पत्नी तीलकुमारी सुनकोशी नदीमा हेलिएको घटनाले सदनमा पनि प्रवेश पाएको छ ।

सिन्धुपाल्चोक–२ का सांसद युवराज दुलालले क्यान्सरपीडित पत्नीलाई पिठ्युँमा बोक्दै सुनकोशी नदीमा पुर्‍याएर बेपत्ता भएका पराजुली दम्पतीबारे विषय उठाएका हुन् ।

Watch On

‘आज जनतामा चरम निराशा छ । हिजो मात्रै काभ्रेपलाञ्चोक मण्डनदेउपुर–७ का एक वृद्ध दम्पतीले सामूहिक रूपमा सुनकोशी नदीमा प्रवेश गरेको, बेपत्ता भएको घटना हामी सबैलाई हृदयविदारक छ । रूवाउने खालको हामीले सबैले किन आशा जगाउन सकेनौं भन्ने प्रश्न हामी सबैप्रति नै छ । हामी सबैले सामूहिक रूपले राज्यलाई एउटा आशावादी र राज्यका रूपमा लिएर जानका लागि म आह्वान गर्न चाहन्छु,’ उनले भने ।

नेकपाबाट निर्वाचित प्रेमबहादुर बयकले पनि पराजुली सम्पती सँगै सुनकोशीमा हेलिएको घटना उठाएका थिए ।

‘मिति २०८३ साउन २० गते सामाजिक सञ्जाल फेसबुक खोल्दा सिधाकुरा डटकम अनलाइनको समाचारमा नजर पुग्यो । समाचारमा लेखिएको थियो– क्यान्सरपीडित श्रीमतीलाई पिठ्युँमा बोकेर नदीमा हाम फाली बेपत्ता । मन बलियो बनाएर समाचार लेख हेर्दा काभ्रेपलाञ्चोकका ६८ वर्षीया केदारनाथ पराजुलीले आफ्नी ६७ वर्षीया क्यान्सरपीडित श्रीमती तीलकुमारी पराजुलीलाई पिठ्युँमा बोकेर बेपत्ता भएको वृद्ध दम्पतीको समाचारले अत्यन्तै मर्माहत बनायो,’ उनले भने ।

उनले संसारकै उत्कृष्ट भनी प्रशंसा गरेको संविधानको धारा ३५ मा स्वास्थ्यको हक, त्यस्तै धारा ४२ मा ज्येष्ठ नागरिकको हकको व्यवस्था गरेको उल्लेख गरे ।

उनले यो व्यवस्था संविधानलाई उत्कृष्ट बनाउन मात्रै व्यवस्था गरेका हौं भन्दै प्रश्न गरे ।

होइन भने सरकार र संविधानले यस्ता नागरिकलाई आफू भएको अनुभूति गराउनुपर्ने उनको जोड थियो ।