राष्ट्रिय भेला नरोकिने शशांक कोइरालाको स्पष्टोक्ति

काठमाडौं । नेपाली कांग्रेसका पूर्वमहामन्त्री एवं राष्ट्रिय भेला आयोजक समितिका संयोजक डा. शशांक कोइरालाले पार्टीभित्रको एकता कायम गर्दै मुलुकसामु देखिएका चुनौतीको सामना गर्न राष्ट्रिय भेला आयोजना गर्न लागिएको बताएका छन् ।

शुक्रबार राष्ट्रिय भेला आयोजक समितिका तर्फबाट आयोजित पत्रकार सम्मेलनमा डा. कोइरालाले कांग्रेसका सम्पूर्ण नेता–कार्यकर्तालाई एकताबद्ध गर्दै राष्ट्रियता, लोकतन्त्र र समाजवादका मूलभूत सिद्धान्तमा आधारित नयाँ कार्यदिशासहित पार्टीलाई नयाँ जीवन दिने भेलाको उद्देश्य रहेको बताए ।

Watch On

उनले वर्तमान राजनीतिक परिस्थितिमा पार्टीको भावी कार्यदिशा तय गर्न आगामी साउन २९ देखि ३१ गतेसम्म काठमाडौंमा हुने राष्ट्रिय भेला कुनै हालतमा नरोकिने स्पष्ट पारे ।

डा. कोइरालाका अनुसार भेलालाई कांग्रेस सभापति शेरबहादुर देउवाले सम्बोधन गर्नेछन् ।

कांग्रेस केन्द्रीय कार्यसमितिको आधिकारिकतासम्बन्धी विवादमा सर्वोच्च अदालतले पुनरावलोकनका लागि अनुमति दिएको विषयलाई पनि उनले स्वागत गरे । पुनरावलोकनबाट आफूहरूले न्याय पाउनेमा विश्वस्त रहेको उनको भनाइ छ ।

‘राष्ट्रियता, लोकतन्त्र र समाजवादका मूलभूत सिद्धान्तलाई आत्मसात् गर्दै पार्टीलाई नयाँ कार्यदिशासहित नयाँ जीवन दिन हामी दृढ संकल्पित छौं,’ पत्रकार सम्मेलनमा डा. कोइरालाले भने ।