विशेष महाधिवेशनको वैधानिकता अदालतमा प्रतिरक्षा गर्छौं– कांग्रेस सभापति थापा

काठमाडौं । नेपाली कांग्रेसका सभापति गगनकुमार थापाले पार्टीको विशेष महाधिवेशन वैधानिक र विधानसम्मत भएकाले त्यसको प्रतिरक्षा अदालतमा गरिने बताएका छन् ।

नेपाल लोकतन्त्रवादी आदिवासी जनजाति महासंघको दोस्रो राष्ट्रिय सम्मेलन उद्घाटन गर्दै सभापति थापाले विशेष महाधिवेशनबारे सर्वोच्च अदालतको पछिल्लो आदेशका सम्बन्धमा आगामी २४ गते बस्ने कांग्रेस केन्द्रीय कार्यसमितिको बैठकमा छलफल गरी आधिकारिक धारणा बनाइने बताए ।

Watch On

विशेष महाधिवेशन वैधानिक र विधानसम्मत थियो भन्ने पुष्टि गर्ने अर्को अवसर प्राप्त भएको उनको भनाइ छ । उनले विधानभन्दा माथि कोही पनि हुन नसक्ने भन्दै कांग्रेसको नियमित महाधिवेशन तोकिएकै समय अर्थात् आगामी मंसिरभित्र सम्पन्न गर्नुपर्ने वैधानिक दायित्व रहेको स्पष्ट पारे ।

थापाले पार्टीका कार्यकर्ता र शुभेच्छुकले राखेको भरोसा टुट्न नदिई कांग्रेसलाई बलियो बनाउन सबैलाई समेटेर अघि बढ्ने बताए । पार्टीभित्र सबैलाई सम्हालेर अघि बढ्ने प्रयास गर्नुपर्ने विषयमा आफू सचेत रहेको उनको भनाइ थियो ।

नयाँ सरकार बनेको अवस्थामा कांग्रेसले प्रतिपक्षको भूमिकाबाट सरकारका कामको खबरदारी गर्नुका साथै संविधानप्रतिको संवेदनशीलता जोगाउने दायित्व निर्वाह गर्ने थापाले बताए ।

संविधान संशोधनका क्रममा त्यसको संवेदनशीलतालाई बुझ्न नसके मुलुक जुनसुकै बेला दुर्घटनामा पर्न सक्ने उनले चेतावनी दिए । संविधान संशोधनका विषयमा सरकारको बुझाइ र निर्णयले देशलाई ठूलो द्वन्द्वतर्फ धकेल्न सक्ने भन्दै कांग्रेसले निरन्तर दबाब र खबरदारी गरिरहने थापाले बताए ।