भदौदेखि देशव्यापी आन्दोलन गर्न लागेको शिक्षक महासंघका केके छन् माग?

काठमाडौं । नेपाल शिक्षक महासंघले विद्यालय शिक्षा सुधारका विषयमा सरकारसँग यसअघि भएका सहमति कार्यान्वयनको माग गर्दै आगामी भदौदेखि पुनः देशव्यापी आन्दोलन गर्ने घोषणा गरेको छ ।

शुक्रबार काठमाडौंमा पत्रकार सम्मेलन गर्दै महासंघले विद्यालय शिक्षा ऐन तत्काल जारी गर्नुपर्ने, शिक्षामा लगानी बढाउनुपर्ने र विद्यालयमा हुने राजनीतिक हस्तक्षेप अन्त्य गर्नुपर्नेलगायतका माग अघि सारेको हो ।

Watch On

महासंघका अध्यक्ष लक्ष्मीकिशोर सुवेदीले आफ्ना मागबारे सरकारलाई जानकारी गराउँदै आन्दोलनलाई पनि सँगसँगै अघि बढाउने बताए । उनका अनुसार भदौ लागेलगत्तै विस्तारित कार्यसमितिको बैठक बसेर आन्दोलनका थप कार्यक्रम तय गरिनेछ ।

त्यसअघि शिक्षा तथा खेलकुदमन्त्रीसमक्ष मागहरू सूचीकृत गरी ध्यानाकर्षणपत्र बुझाइने उनले जानकारी दिए ।

शिक्षक तथा कर्मचारीका दुःख, मर्का र पीडा थपिँदै गएकाले यसपटकको आन्दोलनमा सहभागिता अझ बढ्ने सुवेदीको दाबी छ । आन्दोलन क्रमशः पालिका, जिल्ला र प्रदेश हुँदै काठमाडौं केन्द्रित हुने र यसअघिको भन्दा अझ ठूलो तथा सशक्त बनाइने उनले बताए ।

महासंघले आर्थिक वर्ष २०८३/८४ को बजेटले प्रारम्भिक बाल कक्षाका शिक्षक, विद्यालय कर्मचारी र सिकाइ अनुदानमा कार्यरत शिक्षकलाई तलब वृद्धि, प्रोत्साहन भत्ता तथा महँगी भत्ता उपलब्ध नगराएर विभेद गरेको आरोप लगाएको छ ।

शिक्षा क्षेत्रमा राज्यले कुल बजेटको कम्तीमा २० प्रतिशत लगानी गर्नुपर्ने महासंघको माग छ । साथै विद्यालय शिक्षा ऐन जारी गर्नुपर्ने र विद्यालयमा हुने राजनीतिक हस्तक्षेप अन्त्य गर्नुपर्नेमा महासंघले जोड दिएको छ ।