कार्यसम्पादन मूल्याङ्कनमा बाँके प्रहरी लगातार तेस्रो महिना प्रथम

काठमाडौं । जिल्ला प्रहरी कार्यालय बाँके कार्यसम्पादन मूल्याङ्कनमा लगातार तेस्रो महिना देशभरकै उत्कृष्ट बनेको छ। ‘क’ श्रेणीका १२ जिल्ला प्रहरी कार्यालयमध्ये बाँके असार, साउन र भदौमा लगातार प्रथम भएको हो।

Watch On

प्रहरी प्रधान कार्यालयका अनुसार बाँके पछिल्लो नौ महिनामा पाँचपटक प्रथम र एकपटक दोस्रो भएको छ। यसअघि चैत र वैशाखमा प्रथम तथा जेठमा दोस्रो भएको थियो।

शान्तिसुरक्षा, अपराध नियन्त्रण तथा अनुसन्धान, फैसला कार्यान्वयन, सीमा क्षेत्रमा हुने अवैध गतिविधि नियन्त्रण र नागरिकमैत्री सेवा प्रवाहलगायतका सूचकमा बाँकेको कार्यसम्पादन उत्कृष्ट देखिएको प्रहरीले जनाएको छ।

एसपी अङ्गुर जिसीले उपलब्धि आफ्नो व्यक्तिगत नभई सम्पूर्ण प्रहरी टोलीको सामूहिक प्रयासको परिणाम भएको बताए।

'प्रहरी प्रधान कार्यालयले जिल्ला प्रहरी कार्यालय बाँकेको कार्यसम्पादनलाई देशभरमै उत्कृष्ट ठहर गरेकोमा सम्पूर्ण टोलीप्रति आभार व्यक्त गर्छु,' उनले भने, 'अबको प्राथमिकता बाँकेबासीलाई अझ सुरक्षित अनुभूति गराउने र पीडितलाई छिटो न्याय दिलाउने हो।'

उनले अपराध, लागूऔषध कारोबार र सीमामा हुने अवैध गतिविधिविरुद्ध शून्य सहनशीलताको नीति निरन्तरता दिने बताए।

'पीडित न्यायबाट वञ्चित नहोस् भन्ने हाम्रो पहिलो दायित्व हो। अपराधीमाथि कुनै पनि हालतमा सम्झौता हुँदैन,' उनले भने।