अमेरिका जानुअघि प्रधानमन्त्रीलाई कांग्रेसको सुझाव– भोटेकोशी विपद्‍लाई अन्तर्राष्ट्रियकरण गरौँ

काठमाडौँ । नेपाली कांग्रेसले भोटेकोशी विपद् लगायतका घटनालाई  आवश्यक प्रमाण र दाबीसहित सिङ्गो विश्वको ध्यानाकर्षण गराउन प्रधानमन्त्री बालेन शाहलाई सुझाव दिएको छ ।

Watch On

सोमबार सिंहदरबारमा कांग्रेस उपसभापति विश्वप्रकाश शर्मा र संसदीय दलका नेता भीष्मराज आङ्देम्बेले प्रधानमन्त्री बालेनलाई भेटेर पार्टीको नीति अनुसन्धान प्रशिक्षण प्रतिष्ठानले जलवायु परिवर्तनको असरका बारेमा तयार पारेको धारणा बुझाएका हुन् ।

उपसभापति शर्माले प्रधानमन्त्री संयुक्त राष्ट्रसंघको महासभामा जाँदै गर्दा  प्रधानमन्त्रीलाई सिङ्गो देश, सम्पूर्ण नेपाली र प्रमुख प्रतिपक्षी दलको साथ छ भन्ने बलियो सन्देश दिन खोजिएको बताए ।

उपसभापति शर्माले जलवायु परिवर्तनले नेपालमा पारेको असरलाई अन्तर्राष्ट्रियकरण गर्दा आवश्यक प्रमाण र दाबीसहित सिङ्गो विश्वको ध्यानाकर्षण गराउन आग्रह गरिएको जानकारी दिए ।

नेपालले विश्वको १% भन्दा पनि कम मात्र कार्बन उत्सर्जन गर्दा पनि जन्मकैदको सजाय पाएजस्तो ठूलो विपद् र क्षति बेहोर्नु परेको विषय उठाउन सुझाइएको पनि शर्माले उल्लेख गरे ।

उपसभापति शर्माले नेपालले न्यून कार्बन उत्सर्जन गर्ने सम्पूर्ण साना राष्ट्रहरूको नेतृत्व लिनुपर्ने र सन् २०१५ को पेरिस सम्झौता कार्यान्वयनका लागि ठूला राष्ट्रहरूसँग संयम एवं कूटनीतिक चातुर्यताका साथ गहन संवाद गर्नुपर्ने सुझाव पनि प्रधानमन्त्रीलाई दिइएको जानकारी दिए ।

औपचारिक सम्बोधन मात्र नभई साइडलाइन वार्ता, लबिइङ र मुभमेन्टमार्फत पनि नेपालको पक्षमा विश्वव्यापी ऐक्यबद्धता जुटाउन आग्रह गरिएको बताए ।

छलफलमा प्रधानमन्त्री शाहले राष्ट्रसंघमा प्रस्तुत गर्ने दस्तावेज विज्ञहरूको गहन सुझाव र तथ्यमा आधारित रहेर बनाइएको कांग्रेस नेताहरुलाई जानकारी गराएका थिए ।

प्रधानमन्त्री बालेन राष्ट्रसंघको महासभालाई सम्बोधन गर्न भोलि न्युयोर्क प्रस्थान गर्दैछन् । उनले असोज ८ गते महासभालाई समबोधन गर्ने कार्यक्रम छ ।