एमाले केन्द्रीय कमिटी बैठकका यी हुन् ९ एजेण्डा

ललितपुर। नेकपा (एमाले) को केन्द्रीय कमिटी बैठकमा पार्टीका विभिन्न सांगठनिक संरचना गठन तथा समसामयिक राजनीतिक विषयमा छलफल हुने भएको छ।

Watch On

ललितपुरको भनिमण्डलस्थित रामबाग पार्टी प्यालेसमा सुरु भएको बैठकमा अध्यक्ष केपी शर्मा ओलीले राजनीतिक प्रतिवेदन प्रस्तुत गरिरहेका छन्। बैठकको प्रमुख एजेन्डामा अध्यक्षको राजनीतिक प्रतिवेदनमाथि छलफलसँगै केन्द्रीय कमिटीमा मनोनयन, विभाग गठन, पोलिटब्युरो र स्थायी समिति गठन रहेका छन्।

त्यस्तै, बैठकले सल्लाहकार परिषद्, ज्येष्ठ कम्युनिस्ट मञ्च र अनुशासन आयोग गठनका विषयमा समेत निर्णय गर्ने कार्यसूची तय गरेको छ। समसामयिक राजनीतिक विषयमा प्रस्तावमाथि छलफल गर्ने एजेन्डासमेत बैठकमा राखिएको छ।

अध्यक्ष ओलीले प्रस्तुत गर्ने राजनीतिक प्रतिवेदनमाथि केन्द्रीय सदस्यहरूले धारणा राख्नेछन्। प्रतिवेदनमा समसामयिक राजनीतिक परिस्थिति, पार्टीको सांगठनिक अवस्था तथा आगामी कार्यदिशालगायत विषय समेटिएका छन्। केन्द्रीय सदस्यहरुलाई बोल्न ३ मिनेटको समय दिइएको छ । 

बैठकको माइन्युट लेखनको जिम्मेवारी उपाध्यक्षहरु विष्णुप्रसाद पौडेल र गोकर्ण विष्ट तथा महासचिव शंकर पोखरेललाई दिइएको छ। बैठकमा उठ्ने विषय तथा बहसलाई व्यवस्थित रूपमा टिपोट गर्न योगेश भट्टराई, पद्मा अर्याल, सूर्य थापा, निरज आचार्य र खिमलाल भट्टराई सम्मिलित ‘बहस नोट कमिटी’ गठन गरिएको छ।

बैठकले तय गरिएका एजेन्डामाथि छलफल गर्दै पार्टीको आगामी सांगठनिक संरचना र कार्यदिशासम्बन्धी निर्णय गर्ने एमालेले जनाएको छ।