तलेजुमा कुमारीको हातबाट सर्वसाधारणले लगाए टीका, भवानीलाई देवगृहमा भित्र्याइयो

भक्तपुर । विजयादशमीका अवसरमा आज भक्तपुरस्थित तलेजुमा जीवित देवी एकान्त कुमारीको हातबाट स्थानीय भक्तजन तथा सर्वसाधारणले टीका, जमरा र प्रसाद ग्रहण गरेका छन् ।

Watch On

विजयादशमीको दिन तलेजुमा जीवित देवीका रूपमा पूजिँदै आएकी एकान्त कुमारी लुनिभा बज्राचार्यले सबैभन्दा पहिले शुभसाइतको टीका लगाएकी थिइन् ।

त्यसपछि तलेजुका मूल पुजारी, नाइके, जोशी, कर्माचार्य, गुरु तथा पुरोहितले कुमारीको हातबाट टीका ग्रहण गरेको तलेजुका पूर्वमूल नाइके नरेन्द्रप्रसाद जोशीले जानकारी दिए ।

नाइके, गुरु तथा पुरोहितले टीका लगाएपछि सर्वसाधारणका लागि टीका ग्रहण खुला गरिएको उनले बताए ।

एकान्त कुमारी लुनिभाको हातबाट स्थानीय भक्तजन तथा सर्वसाधारणले टीका ग्रहण गरेपछि दुर्गा विसर्जन गरी तलेजु भवानीलाई दसैँघरबाट मूलचोकको दक्षिणतर्फ रहेको देवगृहमा भित्र्याइएको जोशीले जानकारी दिए । फूलपातीका दिन तलेजु भवानीलाई देवगृहबाट मूलचोकको पश्चिमतर्फ रहेको कुमारी चोकस्थित दसैँघरमा भित्र्याइएको थियो ।

राजोपाध्याय, जोशी र कर्माचार्य पुजारीले तलेजु भवानीसहित अन्य देवीदेवतालाई विधिपूर्वक देवगृहमा भित्र्याएका हुन् ।

तलेजु भवानीसहित देवीदेवतालाई देवगृहमा भित्र्याउने क्रममा १९ जना पुजारीले परम्परागत जामा, पगरी, भोटो र खास्टोसहितका वस्त्र धारण गरेका थिए ।