तिहारमा चोरीदेखि जुवाताससम्म नियन्त्रण गर्न प्रहरीको यस्तो सुरक्षा योजना

काठमाडौँ । तिहार, नेपाल संवत् तथा छठपर्वलाई लक्षित गर्दै नेपाल प्रहरीले ‘चाडपर्वलक्षित विशेष सुरक्षा योजना, २०८३’ लागू गरेको छ । चाडपर्वका समयमा हुन सक्ने चोरी, लुटपाट, जुवातास, सट्टेबाजी, झैझगडा तथा अन्य आपराधिक गतिविधि नियन्त्रण गर्न प्रहरीले विशेष सुरक्षा व्यवस्था मिलाएको हो ।

Watch On

प्रहरी प्रधान कार्यालयका अनुसार चाडपर्वमा हुन सक्ने आपराधिक तथा अवाञ्छित गतिविधि नियन्त्रणका लागि आवश्यकताअनुसार प्रहरी परिचालन गरिएको छ । सार्वजनिक यातायात, मुख्य बजार, सीमानाका तथा भन्सार क्षेत्रमा निगरानी र चेकजाँचलाई तीव्र बनाइएको छ ।

नेपाल प्रहरीका प्रवक्ता अबिनारायण काफ्लेले तिहारमा दियो, बत्ती तथा पटाकाबाट हुन सक्ने आगलागी र दुर्घटनाको जोखिमलाई ध्यानमा राख्दै दमकल तथा विपद् व्यवस्थापन टोलीलाई २४सै घण्टा तयारी अवस्थामा राखिएको बताए ।

उनका अनुसार देउसी–भैलो कार्यक्रम स्थानीय प्रशासनले तोकेको समयभित्र मर्यादित रूपमा सञ्चालन गर्न आग्रह गरिएको छ । पटाकालगायत प्रज्वलनशील तथा विस्फोटक पदार्थको गैरकानुनी ओसारपसार, भण्डारण र बिक्रीवितरण नियन्त्रण गर्न सीमानाका, भन्सार क्षेत्र र बजारमा विशेष चेकजाँच टोली परिचालन गरिएको छ ।

प्रहरीले पटका नपड्काउन, जुवातास तथा सट्टेबाजी नगर्न, मादक पदार्थ सेवन गरेर होहल्ला नगर्न र शान्तिपूर्ण रूपमा चाडपर्व मनाउन स्थानीय रेडियो, पत्रपत्रिका तथा सामाजिक सञ्जालमार्फत सचेतनामूलक सूचना प्रवाह गरिरहेको छ । जुवातास तथा अन्य अवाञ्छित गतिविधि हुन सक्ने सम्भावित क्षेत्रमा सादा पोसाकका प्रहरीसमेत परिचालन गरिएको छ ।

चाडपर्वका अवसरमा आयोजना हुने र्‍याली, जुलुस तथा शोभायात्राका क्रममा विभिन्न समुदायबीच हुन सक्ने विवाद र झडप न्यूनीकरण गर्न पनि सुरक्षा व्यवस्था मजबुत पारिएको प्रवक्ता काफ्लेले बताए । राति अबेरसम्म चर्को आवाजमा डिजे तथा साउण्ड सिस्टम बजाउने, पटका पड्काउने र आतिशबाजी गर्ने गतिविधिमाथि निगरानी बढाइएको उनको भनाइ छ । यस्ता गतिविधिले वृद्धवृद्धा, बालबालिका तथा बिरामीलाई असर पार्न सक्ने भएकाले विशेष सतर्कता अपनाइएको प्रहरीले जनाएको छ ।

चाडपर्वका नाममा अत्यधिक मादक पदार्थ सेवन गर्ने र जुवातास खेल्ने प्रवृत्तिले घरेलु हिंसा, कुटपिट तथा व्यक्तिगत झगडाका घटना निम्त्याउन सक्ने भएकाले त्यस्ता गतिविधि नियन्त्रणलाई प्राथमिकतामा राखिएको छ । त्यस्तै, मेला तथा सार्वजनिकस्थलमा प्लास्टिक, फूलमाला र पूजासामग्रीको अव्यवस्थित विसर्जनबाट हुने जल तथा स्थल प्रदूषण रोक्न सम्बन्धित पक्षसँग समन्वय गरी सचेतना फैलाउने काम भइरहेको प्रहरीले जनाएको छ ।

प्रवक्ता काफ्लेले नागरिकलाई ढुक्क भएर चाडपर्व मनाउन आग्रह गर्दै नागरिकको सुरक्षा र शान्तिका लागि नेपाल प्रहरी सदैव साथमा रहेको बताए ।

तिहार उज्यालो, खुसी, आपसी सद्भाव र भाइचाराको पर्व भएकाले यसलाई सुरक्षित, सभ्य र मर्यादित रूपमा मनाउन प्रहरीले सबैलाई आग्रह गरेको छ । पटका तथा आतिशबाजीको प्रयोगबाट आगलागी, मानवीय चोटपटक, अङ्गभङ्ग, घर तथा सम्पत्तिमा क्षति र वातावरणीय प्रदूषण हुन सक्ने भएकाले विशेष सतर्कता अपनाउन अनुरोध गरिएको छ ।

कुनै स्थानमा आगलागी, विस्फोट वा अन्य दुर्घटना भए तत्काल नजिकको प्रहरी कार्यालय, दमकल वा सम्बन्धित निकायमा खबर गर्न प्रहरीले आग्रह गरेको छ । दुर्घटनामा घाइते भएकाको शीघ्र उद्धार गरी नजिकको स्वास्थ्य संस्थासम्म पुर्‍याउन सहयोग गर्न पनि अनुरोध गरिएको छ । अवैध रूपमा पटका तथा विस्फोटक पदार्थको कारोबार, भण्डारण वा प्रयोग भएको देखेमा प्रहरीको हटलाइन १०० मा जानकारी गराउन सकिने प्रहरीले जनाएको छ ।