काग तिहारको शुभकामना दिँदै प्रधानमन्त्री बालेनले भने– ‘सत्य, न्याय र इमानदारीको बाटोमा अडिग रहौँ’

काठमाडौं । प्रधानमन्त्री बालेन शाहले काग तिहार, धन्वन्तरी जयन्ती तथा आगामी कुकुर तिहारको अवसरमा शुभकामना व्यक्त गर्दै सत्य, न्याय र इमानदारीको बाटोमा अडिग रहन सबैलाई आग्रह गरेका छन्।

Watch On

सामाजिक सञ्जालमार्फत शुभकामना सन्देश जारी गर्दै प्रधानमन्त्री शाहले नेपाली संस्कृति, परम्परा र प्रकृतिसँगको सहअस्तित्वलाई चाडपर्वले जीवन्त बनाउने बताएका छन्।

काग तिहारको सांस्कृतिक महत्त्व उल्लेख गर्दै उनले प्राचीन समयमा कागको आवाजलाई समाचार वा पाहुना आउने संकेतका रूपमा लिने गरिएको स्मरण गरेका छन्। कागलाई यमराजको दूत मानेर मीठा परिकार खुवाउने र शुभ सन्देशको कामना गर्ने परम्परा रहेको उनले बताएका छन्।

उनले यमराजलाई डरको प्रतीकका रूपमा मात्रै नभई न्यायको प्रतीकका रूपमा समेत नेपाली संस्कृतिले व्याख्या गरेको उल्लेख गरेका छन्।

धन्वन्तरी जयन्तीका अवसरमा आरोग्यका देवता भगवान् धन्वन्तरीको स्मरण गर्दै उनले सबैको निरोगी जीवनको कामना गरेका छन्।

त्यस्तै, कुकुर तिहारको सन्दर्भमा उनले कुकुरलाई मानव सभ्यताको विश्वासिलो र वफादार साथीका रूपमा चित्रण गरेका छन्। घरको रेखदेखदेखि अनुसन्धान र उद्धार कार्यसम्म कुकुरले मानिसलाई सहयोग गर्दै आएको उल्लेख गर्दै उनले पशुपन्छीप्रतिको प्रेम, कृतज्ञता र सहअस्तित्वलाई पर्वले थप प्रगाढ बनाउने विश्वास व्यक्त गरेका छन्।

‘सत्य, न्याय र इमानदारीको बाटोमा अडिग रहेर समाजमा सुशासन र जनपक्षीय काम गर्ने प्रेरणा यी पर्वहरूले हामीलाई दिऊन्,’ प्रधानमन्त्री शाहले भनेका छन्।

उनले शुभकामना सन्देशको अन्त्यमा ‘जय देश, जय संस्कृति’ भनेका छन्।