तिहार र छठमा विद्युत् अभाव नहुने, लक्ष्मीपूजामा मागभन्दा उत्पादन बढी हुने प्रक्षेपण

काठमाडौं । नेपाल विद्युत् प्राधिकरणले तिहार र छठ पर्वमा विद्युत् आपूर्ति नियमित र भरपर्दो बनाउन विशेष तयारी गरेको जनाएको छ। प्राधिकरणले यस वर्ष लक्ष्मीपूजाको दिन साँझ विद्युत्को अधिकतम माग करिब एक हजार ७०० मेगावाट पुग्ने अनुमान गरेको छ।

Watch On

प्राधिकरणका कार्यकारी निर्देशक दीर्घायुकुमार श्रेष्ठले लक्ष्मीपूजाका दिन आवश्यक पर्ने विद्युत् आन्तरिक उत्पादनबाटै पर्याप्त हुने बताए।

उनका अनुसार उक्त अवधिमा देशभित्र विद्युत् उत्पादन करिब दुई हजार ५०० मेगावाट पुग्ने प्रक्षेपण गरिएको छ। मागभन्दा उत्पादन बढी हुने भएकाले विद्युत् आपूर्तिमा कुनै अभाव नहुने उनको दाबी छ।

पर्वका बेला विद्युत् आपूर्तिमा अवरोध हुन नदिन प्राधिकरणले सम्बन्धित कार्यालय प्रमुखहरूलाई आवश्यक तयारी गर्न निर्देशन दिएको छ। विद्युत् आपूर्तिमा समस्या देखिए तत्काल मर्मतसम्भार गरी सेवा सञ्चालन गर्न प्राविधिक टोलीलाई तयारी अवस्थामा राख्नसमेत भनिएको छ।

त्यसैगरी प्रसारण लाइन र वितरण प्रणालीको निरीक्षण तथा मर्मतसम्भारका बाँकी काम तत्काल सम्पन्न गर्न निर्देशन दिइएको प्राधिकरणले जनाएको छ।

विद्युत्सम्बन्धी गुनासो तत्काल सम्बोधन गर्न नो लाइट सेवामा आउने फोन नियमित उठाउन र गुनासो व्यवस्थापन प्रभावकारी बनाउन पनि कार्यालय प्रमुखहरूलाई निर्देशन दिइएको छ।