समाज

डोल्पा कारागारबाट भागेका आठमध्ये छ कैदी पक्राउ, दुईको खोजी जारी

सिधाकुरा

सोमबार, कात्तिक २३, २०८३

डोल्पा कारागारबाट भागेका आठमध्ये छ कैदी पक्राउ, दुईको खोजी जारी

कर्णाली । जिल्ला कारागार डोल्पाबाट सुरुङ खनेर फरार भएका आठ कैदीबन्दीमध्ये छ जनालाई प्रहरीले पक्राउ गरेको छ। आइतबार थप दुई जना पक्राउ परेसँगै पक्राउ पर्नेको संख्या छ पुगेको हो।

Watch On

पक्राउ पर्नेमा डोल्पाको त्रिपुरासुन्दरी नगरपालिका–४ का हरिबहादुर बुढा र जाजरकोटका यज्ञ विक रहेका छन्। जिल्ला प्रहरी कार्यालय डोल्पाका प्रहरी नायब उपरीक्षक अनिलराज गिरीका अनुसार उनीहरूलाई त्रिपुरासुन्दरी नगरपालिका–४ रङगाउँभन्दा माथिको जङ्गलमा लुकीछिपी बसेको अवस्थामा पक्राउ गरिएको हो।

पक्राउ परेका बुढा र विक दुवै जबर्जस्ती करणी मुद्दामा कैद भुक्तान गरिरहेका कैदी हुन्।

यसअघि कात्तिक १८ गते प्रहरीले रङगाउँस्थित कमला बुढाको घरमा लुकीछिपी बसेका कालीप्रसाद रोकाय र जाजरकोटका कपिल परियारलाई पक्राउ गरेको थियो।

त्यसैगरी कात्तिक १७ गते रुकुमपश्चिमका रामबहादुर विक र सल्यानका रेशम राना पक्राउ परेका थिए।

कर्णाली प्रदेश प्रहरी कार्यालय सुर्खेतका प्रवक्ता सन्तोषसिंह राठौरका अनुसार गत कात्तिक १४ गते जिल्ला कारागार डोल्पाबाट सुरुङ खनेर आठ जना कैदीबन्दी फरार भएका थिए।

फरारमध्ये छ जना पक्राउ परिसकेको र बाँकी दुई जनाको खोजी भइरहेको प्रहरीले जनाएको छ।

प्रकाशित मिति: सोमबार, कात्तिक २३, २०८३

प्रतिक्रिया दिनुहोस्