तिहारको चहलपहल : बजारमा किनमेलदेखि घरघरमा केराका थामको सजावट

काठमाडौँ । यमपञ्चकको चौथो दिन सोमबार देशभर तिहारको चहलपहल बढेको छ। दीपावलीको तयारीसँगै बजारमा किनमेल गर्ने सर्वसाधारणको भीड बढेको छ भने घर, पसल तथा व्यापारिक प्रतिष्ठानहरू केराका थाम र फूलमालाले सजिन थालेका छन्।

Watch On

काठमाडौँ लगायतका बजार क्षेत्रमा बिहानैदेखि सर्वसाधारण सागसब्जी तथा दैनिक उपभोग्य सामग्री खरिद गर्न व्यस्त देखिएका छन्। तिहारका लागि आवश्यक खाद्यान्न, फलफूल, मिठाई, पूजासामग्री तथा अन्य सामग्री किनमेल गर्नेको चहलपहल बजारमा बढेको छ।

मिथिला क्षेत्रमा भने लक्ष्मीपूजाको तयारीस्वरूप घर तथा पसलमा केराका थामबाट स्वागतद्वार बनाउने क्रम चलेको छ। धनुषाको महेन्द्रनगर बजारमा पसलहरू केराका थामले सजाइएका छन्। मिथिला परम्पराअनुसार लक्ष्मीपूजाका दिन केराका थामबाट स्वागतद्वार बनाएर घर तथा व्यापारिक प्रतिष्ठानमा लक्ष्मीको स्वागत गर्ने चलन छ।

यसैबीच, तिहारको अवसरमा भरतपुर महानगरपालिका–१ स्थित बागेश्वरी आध्यात्मिक परिषद् योगी नरहरिनाथ गौ संरक्षण केन्द्रमा पनि सामूहिक गौपूजा तथा गोवद्र्धन पूजा सुरु भएको छ। केन्द्रमा रहेका गाईको पूजा गरी तिहारको धार्मिक परम्परा मनाउन थालिएको छ।

तिहारमा गाईपूजा, गोवद्र्धन पूजा, लक्ष्मीपूजा र भाइटीकाको विशेष महत्त्व छ। फूलमाला, बत्ती र विभिन्न परम्परागत सामग्रीले घरआँगन सजाउनेदेखि आफन्त तथा परिवारसँग पर्व मनाउने तयारीले सहरदेखि गाउँसम्म उत्सवमय वातावरण बनेको छ।

यसरी बजारको किनमेल, केराका थामले सजिएका पसल र गौसंरक्षण केन्द्रमा सुरु भएको पूजाले तिहारको धार्मिक, सांस्कृतिक तथा सामाजिक रौनकलाई झल्काएका छन्।