संसदको कामकारवाही सहज रुपमा अघि बढ्नेगरि जिम्मेवार हुन दलहरुलाई सभामुखकाे आग्रह

काठमाडाैँ । सभामुख देवराज घिमिरेले संसदको कामकारवाही सहज रुपमा अघि बढ्नेगरि जिम्मेवार हुन आग्रह गरेका छन् ।

Watch On

आइतबार सिंहदरबारमा संसदको अवरोध, सरकारको नीति तथा कार्यक्रमको तयारी लगाएतका विषयमा विभिन्न राजनीतिक दलका मुख्य सचेतक र प्रमुख सचेतकहरुसँग छलफल गर्दै सभामुख घिमिरेले संसदको आगामी बैठक सहज रुपमा चल्ने वातावरण बनाउन आग्रह गरेका हुन् । छलफलका क्रममा कांग्रेसले गृहमन्त्रीमाथि संसदीय छानविन समिति गठन गर्नुपर्ने अडान कायमै रहेको जानकारी गराएको थियो । सत्तारुढ दलले अहिलेको अवस्थामा समिति गठन नहुने धारणा राखेको थियो ।

बैठकपछि कांग्रेस मुख्य सचेतक रमेश लेखकले छानविन समितिको अडानका बारेमा जानकारी गराएको बताए । उनले संसद अवरुद्ध गर्ने अवस्था सिर्जना गरेर सरकारले प्रतिपक्षीसंग न्याय नगरेको धारणा राखे । यस बिषयमा प्रधानमन्त्रीलाई पनि जानकारी गराएको अवस्थामा प्रधानमन्त्रीले उचित निकास निकाल्ने उनको भनाइ छ ।

त्यस्तै एमालेका प्रमुख सचेतक महेश बर्तौलाले प्रमुख प्रतिपक्षले उठाएको संसदीय छानबिन समितिको विषय कानूनसम्मत नभएको बताए । उनले समितिका नाममा कांग्रेसले सरकार माग गरेकाले सम्भव नरहेको जिकिर गरे ।

त्यस्तै राष्ट्रिय स्वतन्त्र पार्टीका प्रमुख सचेतक सन्तोष परियारले सदन सुचारु गर्ने बिषयमा छलफल भएको बताए । उनले संसदको गतिरोध अन्यका लागि निरन्तर छलफल हुने धारणा राखे ।

त्यस्तै राप्रपाका प्रमुख सचेतक ज्ञानेन्द्र शाहीले सहकारी प्रकरणमा जोडिएका जिवी राईको खोजीका लागि सरकार गम्भीर हुनुपर्ने बताए । जिबीलाई प्रधानमन्त्रीले भगाएको अभिव्यक्ति सहि भए कारवाही गर्नुपर्ने उनको भनाइ छ ।

बैठकपछि कानुन, न्याय तथा संसदीय मामिला मन्त्री पदम गिरीले सरकारको जेठ १ गते प्रस्तुत गर्न लागेको नीति तथा कार्यक्रमलाई सहज रुपमा प्रस्तुत गर्ने वातावरण बनाउने विषयमा छलफल भएको जानकारी दिए । उनले अहिलेको अवस्थामा संसदीय समिति गठन नहुनेमा स्पष्ट रहेको धारणा राखे ।

जेठ १ गते बस्ने संघीय संसद्को दुवै सभाको संयुक्त बैठकमा राष्ट्रपति रामचन्द्र पौडेलले सरकारको नीति तथा कार्यक्रम पेश गर्ने कार्यक्रम छ । उक्त बैठकलाई सहज रुपमा अघि बढाउने वातावरण बनाउन सभामुखले बिभिन्न दलसंग छलफल गरेका हुन् ।