सिधाकुरा डटकम विरुद्धको अवहेलना मुद्दाको फैसला भदौ ६ गते

काठमाडौँ । सिधाकुरा डटकम र यसका प्रकाशक तथा सम्पादक विरुद्धको मुद्दाको फैसला भदौ ६ गते सुनाइने भएको छ । सर्वोच्च अदालतमा बिहीबार प्रधानन्यायाधीश नेतृत्वको ९ जनाको बृहत पूर्ण इजलासले बहश सकिएपछि भदौ ६ गतेलाई निर्णय सुनाउने आदेश गरेको हो ।

Watch On

सर्वोच्चले त्यसअघि १५ दिन भित्र बहश नोट पेश गर्न पनि कानुन व्यवसायीहरुलाई आग्रह गरेको छ । बिहीबार प्रधान न्यायाधीश विश्मम्भरप्रसाद श्रेष्ठको नेतृत्वमा बसेको बृहत पुर्ण इजलासमा न्यायाधीशहरु प्रकाशमानसिंह राउत, सपना प्रधान मल्ल, प्रकाशकुमार ढुंगाना, हरिप्रसाद फुयाँल, नहकुल सुवेदी, विनोद शर्मा, महेश शर्मा पौडेल र बालकृष्ण ढकाल मुद्धाको सुनुवाइमा सहभागी भएका थिए ।

सिधाकुराकातर्फबाट वरिष्ठ अधिवक्ता बालकृष्ण न्यौपाने, ध्रुबलाल श्रेष्ठ, अधिवक्ताहरु बाबुराम अर्याल, डा.नारायण कंडेल, कपिलदेव ढकाल, शुलभ खरेल, मणिराम उपाध्याय, प्रदीप पोखरेल, राजेन्द्र दंगाल लगायतले बहस गरेका थिए ।

अदालतले आफैँ प्रतिवेदन उठाएर दायर गरेको अवहेलना  मुद्दामा अदालतको तर्फबाट नेपाल बार एशोसिएसन, सर्वोच्च अदालत बार, महान्याधिवक्ताको कार्यालय केही कानुन व्यवसायीहरुले बहश गरेका थिए ।

सिधाकुरा डटकमले गत जेठ १४ गते ‘द डार्क फाइल’ नामक खोजमुलक समाचारको श्रृंखला प्रकाशन तथा प्रसारण गरेको थियो । उक्त समाचार प्रकाशनपछि सर्वोच्च अदालत प्रशासनले नै सिधाकुराविरुद्ध अदालतको अवहेलनासम्बन्धी मुद्दा दायर गरेको थियो । त्यसपछि सर्वोच्चले सिधाकुराले प्रकाशन तथा प्रसारण गरेको सो शृखंलाका सबै समाचारहरु हटाउन आदेश गरेको थियो । अदालतको आदेशपछि सिधाकुराले सो समाचार सामग्रीहरु हटाएर कानुन प्रक्रियामा सहभागी भएको थियो ।